Toshkentda Nexia ustunga urildi, haydovchi vafot etdi

Toshkent shahrining Olmazor tumanida yuz bergan YTH oqibatida 19 yoshli haydovchi halok bo‘ldi

Toshkent shahar IIBB matbuot xizmati xabar berishicha, 26 oktabr kuni soat 22:45da Toshkent shahrining Olmazor tumani hududidan o‘tuvchi Kichik halqa yo‘lida yo‘l-transport hodisasi yuz berdi.

Shahar sil kasalliklari shifoxonasi yaqinida 19 yoshli Nexia haydovchisi boshqaruvni yo‘qotib, elektr simlari ustuniga urilgan.

YTH oqibatida haydovchi tan jarohatlari bilan kasalxonaga yetkazilgan, ammo shifokorlar tomonidan ko‘rsatilgan tibbiy yordamga qaramay, vafot etgan.

Avtomobilda bo‘lgan yo‘lovchilar, 19 yoshli Diyor K, Javohir Z va Muhammadaziz A. tan jarohatlari bilan shifoxonaga yotqizilgan. Ularga zaruriy tibbiy yordam ko‘rsatilmoqda.

Dastlabki ma'lumotlarga ko‘ra, YTH Nexia haydovchisining tezlikni oshirgani hamda uning boshqaruvni yo‘qotgani oqibatida yuz bergan.