Rossiyaning raketa hujumidan ogohlantiruvchi sun'iy yo‘ldoshi atmosferada yonib ketdi

Tinch okeani akvatoriyasi ustida Rossiyaning «Kosmos-2422» kosmik qurilmasi orbitadan chiqdi va atmosferada yonib ketdi. Bu haqda Rossiya mudofaa vazirligi xabar berdi.

Ushbu harbiy sun'iy yo‘ldosh 2006 yilda «Molniya-M» tashuvchi-raketasi yordamida orbitaga olib chiqilgandi.

«Zvezda» telekanalining qayd etishicha, qurilma o‘z resurslarini ishlatib bo‘lgan.

Shu yilning yanvarida 2007 yilda orbitaga chiqarilgan «Kosmos-2430» sun'iy yo‘ldoshi atmosferada yonib ketgandi. O‘shanda Rossiya havo-kosmik qo‘mondonligi «Kosmos-2430»ni rejali ravishda orbitadan chiqarganini ma'lum qilgandi.

Qurilmalar qit'alararo ballistik raketalar parvozini aniqlashga mo‘ljallangan «Oko» tizimining bir qismi edi.