«Qishloq qurilish bank» Buxoro viloyatiga press-tur uyushtirdi

Foto: Qishloq qurilish bank

Aksiyadorlik-tijorat «Qishloq qurilish bank» o‘z faoliyatida ochiqlik va shaffoflikni ta'minlash, aholiga kengroq ma'lumot yetkazish maqsadida ommaviy axborot vositalari bilan tizimli hamkorlikni amalga oshirmoqda. Yaqinda bank tomonidan jurnalistlar uchun Buxoro viloyatiga press-tur tashkil qilindi. Unda respublikamizdagi eng yetakchi ommaviy axborot vositalari vakillari ishtirok etishdi.

Viloyatda ayni vaqtda «Qishloq qurilish bank»ning Buxoro mintaqaviy filiali, Kogon va Galaosiyo filiallari, Kogon, Qorako‘l, Jondor, Shofirkon, G‘ijduvon minibanklari faoliyat ko‘rsatmoqda. Ular orqali 74214 nafar mijozga xizmatlar ko‘rsatilmoqda.

Jurnalistlar uchun Buxoro mintaqaviy filialida tashkil qilingan taqdimot tadbirida bank tuzilmalari erishayotgan iqtisodiy ko‘rsatkichlar haqida ma'lumot berildi. Unda xizmatlar ko‘lami va bank mijozlari soni muttasil kengayib borayotgani qayd etildi.

Press-tur ishtirokchilari Buxoro viloyatida bank moliyaviy ko‘magida amalga oshirilayotgan investitsion loyihalar bilan tanishdilar. Xususan, «Qorovulbozor nur obod» MChJ tomonidan Qorovulbozor tumanida 9 gektar hududda barpo etilgan zamonaviy issiqxonaga, «Kogon mehnat rohat» XK tomonidan qurilgan istirohat bog‘i va ko‘ngilochar-hordiq chiqarish majmuasiga, «Burda Lyuks Tekstil» XKning tekstil mahsulotlari ishlab chiqarish sexiga, «City Med Buxoro» MChJ tashkil qilgan tibbiy-diagnostika va davolash markaziga, «Vuxoro Komfort Plast» MChJda plastik quvurlar va plastik fitinglar ishlab chiqarish sexiga, «Panorama» mehmonxonasiga safarlar uyushtirildi.

«Qishloq qurilish bank» moliyaviy ko‘magida tatbiq etilayotgan biznes loyihalar jurnalistlarda katta qiziqish uyg‘otdi.

Loyiha tashabbuskori bo‘lgan tadbirkorlar bank sarmoyasi ishlab chiqarish quvvatlarini oshirish, zamonaviy texnologiya va uskunalar sotib olish, eksportbop va raqobatbardosh mahsulotlar ishlab chiqarish, aholiga xizmat ko‘rsatish sifatini yaxshilash va yangi ish o‘rinlari yaratilishida muhim o‘rin tutganligini bildirdilar.

Press-tur doirasida bankning Galaosiyo filiali yangi binosi foydalanishga topshirildi. Jurnalistlar filialda mijozlar uchun yaratilgan sharoitlar va qulayliklar bilan tanishdilar va mijozlar bilan suhbatlashdilar.