Soliq organlari soliq to‘lovchiga penya to‘laydigan bo‘ladi

Shu kunlarda yangi tahrirdagi Soliq kodeksi loyihasi bo‘yicha keng jamoatchilik vakillari, deputatlar, tadbirkorlik sub'yektlari, soliq va moliya sohasi mutaxassislari o‘rtasida muhokamalar davom etmoqda.

DSQ matbuot xizmatiga ko‘ra, yangi tahrirdagi Soliq kodeksi loyihasida taklif etilayotgan yana bir o‘zgarish ortiqcha to‘langan soliqni hisobga olish yoki qaytarishning yangi tartibi nazarda tutilayotgani bilan bog‘liq.

Xususan, ortiqcha to‘langan soliq miqdorini o‘z vaqtida qaytarish va ortiqcha yig‘ilgan soliq summasini hisobga olish (qaytarish) mexanizmini joriy etish rejalashtirilgan.

Bunda har bir kechiktirilgan kun uchun soliq summasi qaytarilgan taqdirda soliq organi soliq to‘lovchiga, shu jumladan, yuqori turuvchi soliq organi yoki sud tomonidan bekor qilingan taqdirda foizlarni to‘laydi.

Hisob-kitoblarni soddalashtirish maqsadida soliqlar, penyalar va jarimalar miqdori bitta hisobda to‘lanadi, ammo hisobni yuritish G‘aznachilikning 3 xil hisobvarag‘i orqali amalga oshiriladi.