Zarar bilan chiqadigan 9ta viloyatga 2020 yilda 5,1 trln so‘m ajratiladi

Qonunning 6-ilovasida 2020 yil uchun Qoraqalpog‘iston Respublikasi budjeti, viloyatlar ham Toshkent shahri mahalliy budjetlarining daromadlari va xarajatlari prognozi keltirilgan.

Jadvaldan ko‘rinishicha, deyarli barcha hududlarda xarajatlar daromadlardan ortiq bo‘ladi.

Xususan, Andijon, Jizzax, Qashqadaryo, Namangan, Samarqand, Surxondaryo, Sirdaryo, Farg‘ona va Xorazm viloyatlarida o‘ziga xos budjet taqchilligi kutilmoqda. Faqatgina Qoraqalpog‘iston Respublikasi, Buxoro, Navoiy, Toshkent viloyatlari hamda Toshkent shahrida xarajatlar daromadlardan ortiq bo‘lmaydi.

Zarar bilan chiqqan viloyatlarda qo‘shimcha mablag‘lar zarur bo‘ladi. Qonunda viloyatlarning mahalliy budjetiga respublika budjetidan ajratiladigan tekislovchi budjetlararo transfertlar miqdori ham keltirib o‘tilgan.

9ta viloyatga dotatsiya yordami ko‘rsatiladi. Eng katta yordam Namangan viloyatiga beriladi — 977,7 mrld so‘m. So‘ngra Surxondaryo (839,1 mlrd so‘m) va Qashqadaryo (758,1 mlrd so‘m) viloyatlari joylashgan. Eng kam yordam Farg‘ona (351,9 mlrd), Sirdaryo (343,9 mlrd) va Samarqand (321,8 mlrd) viloyatlariga ajratiladi.