Namanganda yirik miqdordagi giyohvandlik vositasi qo‘lga olindi

Namangan viloyatida Davlat xavfsizlik xizmati va bojxona organlari hamkorligida o‘tkazilgan tezkor tadbir davomida qariyb 4 kilogramm gashish moddasining noqonuniy aylanmasiga chek qo‘yildi. Holat yuzasidan jinoyat ishi qo‘zg‘atilib, tergov harakatlari olib borilmoqda.

Ma’lum qilinishicha, Davlat xavfsizlik xizmatining Namangan viloyati bo‘yicha boshqarmasi hamda viloyat Bojxona boshqarmasi xodimlari tomonidan o‘tkazilgan tezkor tadbirda «Toshkent – Namangan» yo‘nalishida harakatlanayotgan «Kobalt» rusumli avtomashina Pop tumanidagi «Namangan» YPX maskanida to‘xtatilib, belgilangan tartibda ko‘zdan kechirilgan.

Tekshiruv jarayonida avtomashinada yo‘lovchi sifatida harakatlanayotgan, Namangan shahrida yashovchi, muqaddam sudlangan 1989 yilda tug‘ilgan shaxsga tegishli sumkadan 3 kilogramm 956 gramm «gashish» giyohvandlik vositasi aniqlanib, ashyoviy dalil sifatida rasmiylashtirib olingan.

Tergovga qadar tekshiruv davomida mazkur shaxs ushbu giyohvandlik vositasini muqaddam sudlangan hamshahari bilan til biriktirgan holda qo‘shni davlatdan aylanma yo‘llar orqali olib kelgani ma’lum bo‘lgan. Natijada ikkinchi gumonlanuvchi ham protsessual tartibda ushlangan.

Hozirda mazkur shaxslarga nisbatan jinoyat ishi qo‘zg‘atilib, tergov harakatlari davom ettirilmoqda.

Mutasaddi idoralar fuqarolarni giyohvandlik vositalarining noqonuniy aylanmasi bilan bog‘liq holatlar haqida tegishli organlarga zudlik bilan xabar berishga chaqirmoqda.