“Amirsoy” tog‘-chang‘i kurorti 22 dekabr kuni o‘z faoliyatini to‘xtatib turadi

“21-22 dekabr kunlari O‘zbekistonda kuchli shamol va qor yog‘ishi kutilmoqda. Havo harorati kunduzi “-5, -7” darajagacha pasayadi. Shu munosabat bilan, sizning xavfsizligingiz hamda qulayligingizni ta'minlash maqsadida, “Amirsoy” tog‘-chang‘i kurortiga olib boruvchi hududdan o‘tish faqat qishki shinali old va to‘liq g‘ildirakli avtomobillar uchun ruxsat etiladi”, deb xabar berdi Turizmni rivojlantirish davlat qo‘mitasi matbuot xizmati.

Xabarda ta'kidlanishicha, yozgi shinali avtomashinalarning o‘tishiga yo‘l qo‘yilmaydi.

Bundan tashqari, “Amirsoy” tog‘-chang‘i kurorti avtoturargohi 500 mashinaga mo‘ljallangani bois, avtotransport vositalari avtoturargohning to‘lishiga qarab to‘xtatiladi.

Shuningdek, ochilish marosimidan keyin, 22 dekabr kuni olib boriladigan profilaktik ishlar va hududni tozalash ishlari tufayli “Amirsoy” tog‘-chang‘i kurorti o‘z faoliyatini to‘xtatib turadi va mehmonlarning hududga kirishi taqiqlanadi.