15:04 / 24.02.2020
0
9555
Қозоғистонда ноқонуний равишда қурол етказиб бериш билан шуғулланган гуруҳ фаолиятига чек қўйилди

Суриштирув давомида ушбу гуруҳ фаолиятида ички ишлар органи ходими иштирок этганлиги аниқланган.

Фото: Қозоғистон миллий хавфсизлик қўмитаси

Қозоғистон миллий хавфсизлик қўмитаси ходимлари ўқотар қуроллар етказиб бериш билан шуғулланган халқаро канал фаолиятига чек қўйди. Қўмитанинг хабарига кўра, 10 нафар маҳаллий аҳоли жиноий жавобгарликка тортилган.

Хабарда айтилишича, 2019 йил июнда Қозоғистон миллий хавфсизлик қўмитаси ўқотар қуроллар етказиб бериш билан шуғулланган халқаро канал фаолиятига чек қўйган. Уч дона Калашников автомати, уч дона гранатомёт, икки дона жанговар граната, 14 дона тўппонча, 1,7 минг донадан ортиқ патрон ва қурол қисмлари мусодара қилинган.

Маълумот берилишича, суриштирув давомида ушбу гуруҳ фаолиятида ички ишлар органи ходими иштирок этганлиги аниқланган. 

"Мансабдор шахс томонидан Қозоғистон ИИВ балансида бўлган қуроллар ўғирланганлиги аниқланди", - дейилади хабарда.

Ушбу иш бўйича Олмаота шаҳри ва Олмаота вилоятида яшовчи 10 нафар шахс жиноий жавобгарликка тортилган. 27 январь куни улар турли муддатларга озодликдан маҳрум қилинган. Шунингдек, қурол йиғиш билан шуғулланувчи устахона фаолиятига ҳам чек қўйилган.

Ушбу хабарга фикрингизни билдиринг. Бунинг учун авторизациядан ўтишингиз керак!
Top