Yaponiyada koronavirus sababli F-35 qiruvchi samolyotlarini ishlab chiqarish to‘xtatildi

Amerikaning Lockheed Martin korporatsiyasi koronavirus xavfi sababli Yaponiyadagi zavodida F-35 qiruvchi samolyotlarini ishlab chiqarishni to‘xtatdi. Bu haqda Defense One portali AQSh mudofaa vazirining xaridlar bo‘yicha o‘rinbosari Ellen Lordga tayanib xabar berdi.

"O‘ylashimcha, ular ishni bir haftaga to‘xtatishga qaror qildi", - deya undan iqtibos keltiradi portal.

Lordning so‘zlariga ko‘ra, Italiyadagi zavodda esa xodimlar masofadan ishlashga o‘tgan.

Lockheed Martin F-35 samolyotlarining asosiy qismini Texasdagi zavodida ishlab chiqaradi, ammo ittifoqchilarga mo‘ljallangan qiruvchilarning bir qismi Yaponiya va Italiyadagi zavodlarda ishlab chiqariladi.

Avvalroq Koronavirusga chalinish xavfini kamaytirish maqsadida Hongkong, Yaponiya va Janubiy Koreyadagi Twitter xodimlari masofadan ishlashga o‘tgani xabar qilingandi.