«Lukoyl» bilan geologiya-qidiruv ishlari bo‘yicha qo‘shma korxona tashkil etiladi

2020 yilning 5 mart kuni prezident Shavkat Mirziyoyev Rossiyaning “Lukoyl” kompaniyasi prezidenti Vagit Alekperovni qabul qilgandi.

Davlat rahbari boshchiligida o‘tgan ushbu uchrashuvda “O‘zbekneftgaz” aksiyadorlik jamiyati boshqaruvi raisi Mehriddin Abdullayevga ham tegishli ko‘rsatma va topshiriqlar berildi.

“O‘zbekneftgaz” AJ matbuot xizmati xabariga ko‘ra, 6 mart kuni prezident tomonidan berilgan ko‘rsatma va topshiriqlar ijrosi yuzasidan “O‘zbekneftgaz” boshqaruvi tomonidan yig‘ilish o‘tkazildi.

Tadbirda O‘zbekiston hududida geologiya-qidiruv sohasida, uglevodorod konlarini o‘zlashtirish borasida kooperatsiyani mustahkamlash maqsadida, “O‘zbekneftgaz” AJ va “Lukoyl” kompaniyasi hamkorligining yangi bosqichi belgilab olindi hamda “Yo‘l xaritasi” tuzildi.  

Unga ko‘ra:

“Lukoyl” kompaniyasining ishlab chiqarish va qazib olish obektlarini o‘rganish va ushbu obektlarda raqamli texnologiyalarning qo‘llanishi bilan tanishish uchun “O‘zbekneftgaz” AJ delegatsiyasi a'zolari, Rossiyaning Perm o‘lkasiga tashrif buyuradi;

“O‘zbekneftgaz” AJ va “Lukoyl” kompaniyasi “Raqamli kon” konsepsiyasi doirasida tajriba almashishdan tashqari, ishlab chiqarish davomida raqamli ERP tizimini qo‘llashda o‘zaro hamkorlikni yo‘lga qo‘yadi;

geologiya-qidiruv ishlarini amalga oshirish uchun “O‘zbekneftgaz” AJ va “Lukoyl” kompaniyasi hamkorligida qo‘shma korxona, “Ilmiy-o‘quv markaz tashkil etilishi, Toshkent, Buxoro va Qashqadaryo viloyatlarida esa hamkorlikda ijtimoiy loyihalarni amalga oshirish rejalashtirilmoqda. 

Bildirilishicha, belgilab olingan rejalarni amalga oshirilishi ikki tomonning kelishuvi asosida nazorat qilinadi.