Ko‘p qavatli xonadonlarda issiq suvni vaqtinchalik o‘chirish karantin tufayli qoldirildi

«Ko‘p kvartirali uylarda mavsumiy reglament ishlarni tashkil etish bilan bog‘liq bo‘lgan issiq suvning vaqtinchalik o‘chirish tadbirlari karantin yakunlanguncha qoldirildi. Joylarda uy-joy mulkdorlari shirkatlari (UJMSh)lar tomonidan davlat sanitariya epidemiologiya nazorat (DSEN) markazlari bilan hamkorlikda ko‘p kvartirali uylarning umumiy foydalanish joylari (kirish yo‘laklari, bolalar o‘yingohlari, zinapoya, tutqichlar, eshik, yerto‘la) belgilangan sanitariya me'yorlari bo‘yicha dezinfeksiya qilish ishlari amalga oshirilmoqda.

Karantin holatida ommaviy tadbirlar bekor qilingani, barcha o‘quv muassasalari ta'tilga chiqqani, aholining ko‘pchiligi vaqtlarini o‘z uylarida o‘tkazayotgani o‘z-o‘zidan ichimlik suviga bo‘lgan ehtiyoj oshishiga olib keladi.

Ushbu vaziyatni e'tiborga olgan holda barcha suv ta'minoti korxonalari kuchaytirilgan ish rejimiga o‘tkazildi.

Karantin sharoitida kommunal xizmatlar ko‘rsatish, xususan ichimlik suv va issiqlik ta'minoti masalalari bo‘yicha aholidan tushgan murojaatlarni qabul qilish va yuzaga kelgan muammolarni tezkorlik bilan bartaraf etishni ta'minlash maqsadida, Qoraqalpog‘iston Respublikasi uy-joy kommunal xizmat ko‘rsatish vazirligi, viloyatlar uy-joy kommunal xizmat ko‘rsatish boshqarmalari hamda Suv ta'minoti va issiqlik ta'minoti korxonalarida maxsus navbatchilik tashkil etilgan. Aholi murojaatlari qisqa 1184 raqami orqali qabul qilinadi», deya Axmedovning so‘zlarini keltirmoqda Kun.uz muxbiri.