18:23 / 07.04.2020
7286
Тиббий ниқоб ва комбинезонлар учун Хитойдан 40 тонна хом ашё келтирилди

Жорий йилнинг 5 апрель куни тиббиёт ниқоблари ва комбинезонларни ишлаб чиқариш учун зарур бўлган 40 тоннадан зиёд хом ашё Хитойдан махсус чартер рейс орқали олиб келинди.

Фото: Getty Images

Коронавирус пандемиясининг кенг тарқалиши туфайли бутун дунё, шу жумладан Ўзбекистонда ҳам тиббий ҳимоя воситаларини ишлаб чиқаришда ишлатиладиган асосий хом ашё ҳисобланган спанбонд, СМС ва мельтблаун танқислиги юзага келган эди. 

«Ўзтўқимачиликсаноат» уюшмаси, Фармацевтикани ривожлантириш агентлиги ҳамда Ўзбекистоннинг Хитойдаги элчихонаси билан ҳамкорликда хом ашё масаласи танқислигига барҳам бериш мақсадида махсус рейс орқали 40 тоннадан зиёд хом ашё Ўзбекистонга олиб келинди, деб хабар бермоқда уюшма ахборот хизмати.

Махсус рейс орқали келтирилган юкда СМС матоси, резинка, ҳимоя комбинезонлари ва ниқоблари ҳам олиб келинди.

Таъкидланишича, амалга оширилган чартер рейс биринчи бўлиб, шу ой давомида зарур хом ашёни бир неча чартер рейслар ва темир йўл контейнерлари орқали олиб келиниши кутиляпти.

Аввалроқ, Ўзбекистон Республикаси Президенти Шавкат Мирзиёев бошчилигида ўтган видеоселектор йиғилишида коронавируснинг аҳоли орасида кескин ошишига йўл қўймаслик мақсадида тиббиёт ниқоблари ва халатларини ишлаб чиқариш ҳажми кунига 5 миллион донага етказиш бўйича бир қатор топшириқлар берилганди.

31 март ҳолатига кўра, ҳимоя ниқобларини ишлаб чиқарувчи корхоналар сони 195тага етган ва март ойининг 1-санасига нисбатан 9,3 баробарга ошди. Ниқоблар ишлаб чиқаришнинг кунлик ҳажми 2 миллион 640 минг донани ташкил этмоқда.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top