10:13 / 13.04.2020
42881
Самарқандда 63 ёшли фуқарога оғир тан жароҳати етказган шахс қамоққа олинди

ИИВ ҳузуридаги Тергов департаменти ижтимоий тармоқларда Самарқандда 63 ёшли киши уриб-дўппослангани ҳақида тарқалган хабарлар юзасидан расмий маълумот берди

Фото: Видеодан кадр

2020 йилнинг 29 март куни тахминан соат 02:30да 32 ёшли А.Т. Самарқанд шаҳрида жойлашган “Табиат-саховат” деҳқон бозори олдида жойлашган дўкон олдига келган.

Тергов департаменти хабарида айтилишича, у шу дўконда норасмий қоровул бўлиб ишлаган фуқаро 63 ёшли Х.М.га қорни очганлигини ва унга “хот-дог” тайёрлаб беришини айтган, аммо Х.М. унга дўкон карантин сабабли дўкон ёпиқлигини айтганидан сўнг у билан жанжаллашиб қолиб, Х.М.ни қўл ва оёқлари билан қасддан уриб-дўппослаб, унга оғир тан жароҳати етказган.

Мазкур ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан фуқаро А.Т.га нисбатан Ўзбекистон Республикаси Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.

Жиноят иши бўйича А.Т.га ЖКнинг 104-моддаси 2-қисми “в” банди (ўта шафқатсизлик билан, қасддан баданга оғир шикаст етказиш) билан айб эълон қилиниб, унга нисбатан “қамоққа олиш” тарзидаги эҳтиёт чораси қўлланилган. Ҳозирда дастлабки тергов ҳаракатлари давом эттирилмоқда.

Top