09:19 / 17.04.2020
15500
ДСҚда коронавирус пандемияси туфайли ходимлар иш ҳақи миқдори камайтирилгани маълум қилинди

2 йил аввал давлат солиқ хизмати органлари ходимларининг лавозим маошлари 1,7 баравар оширилган эди 

Давлат солиқ қўмитаси (ДСҚ) коронавирус пандемияси сабабли ўз ходимларининг иш ҳақи миқдори камайтирилгани тўғрисида маълум қилди.

“Бугун мамлакатимизда коронавирус инфекциясининг тарқалиши ва унинг оқибатидан ҳар биримиз хавотирдамиз. Ҳаммамиз ушбу пандемияга тезда барҳам беришни хоҳлаймиз.

Кўп миллатли ва ҳамжиҳат мамлакатда яшаяпмиз. Биз 34 миллион нафардан ортиқмиз. Давлатимизнинг қўллаб-қувватлаши натижасида 2 йил аввал Давлат солиқ хизмати органлари ходимларининг лавозим маошлари 1,7 баравар оширилган эди”, - дея қайд этиб ўтган ДСҚ Касаба уюшмаси қўмитаси раиси Евгений Маҳмудов.

Унинг айтишича, ана шундай мушкул дамларда давлат солиқ хизмати ходимлари меҳнат самарадорлиги билан ёрдам беришга тайёр. 

“Мамлакатда бундай оғир дамларга дош беришда биз, давлат идоралари хизматчиларидан кўра кўпроқ ёрдамга муҳтож ҳамюртларимиз бор.

Солиқ органлари ходимларининг аксарияти 4 миллион сўмдан зиёд бўлган иш ҳақи миқдорини камайтириш тўғрисидаги тавсияларга тушуниш ва ҳамжиҳатлик билан муносабат билдиришди.

Давлат органлари ходимларининг иш ҳақини камайтириш бюджет харажатларини оптималлаштиришдаги адолатли ва муҳим қадам, деб ҳисоблайман”, - дейди у.

Таъкидланишича, айнан қийин вазиятларда инсон ички олами ва жамиятнинг етуклиги, бирдамлиги намоён бўлади.

Top