MDH Tashqi ishlar vazirlari kengashining majlisi videokonferensaloqa shaklida bo‘lib o‘tadi

2020 yilning 12 may kuni O‘zbekistonning Mustaqil Davlatlar Hamdo‘stligiga raisligi doirasida videokonferensaloqa shaklida Hamdo‘stlik ishtirokchi davlatlari Tashqi ishlar vazirlari kengashining majlisi bo‘lib o‘tadi.

TIV xabariga ko‘ra, O‘zbekiston tashqi ishlar vaziri Abdulaziz Komilov raisligidagi majlis ishida Armaniston, Belarus, Moldova, Ozarboyjon, Qirg‘iziston, Qozog‘iston, Rossiya, Tojikiston va Turkmaniston tashqi siyosat idoralari rahbarlari hamda MDH Ijroiya qo‘mitasi raisi – ijrochi kotibi Sergey Lebedev ishtirok etadilar.

Tadbir chog‘ida xalqaro kun tartibining va Hamdo‘stlik formatidagi hamkorlikning dolzarb masalalari yuzasidan fikr almashish, MDH doirasida 2019 yilga mo‘ljallangan ko‘p darajali vazirliklararo maslahatlashuvlar rejasining amalga oshirilishini va 2020 yil uchun Rejani, shuningdek koronavirus tarqalishiga qarshi birgalikda qarshi kurashish yo‘llarini muhokama qilish ko‘zda tutilgan.

Majlis yakunida qator hujjatlarni imzolash rejalashtirilgan, deyiladi ma'lumotda.