14:39 / 16.05.2020
23534
Франциялик вазир коронавирусга қарши вакцина қачон пайдо бўлишини айтди

ЖССТ коронавирусга қарши курашдаги муваффақият керакли дори воситаларининг қанчалик тез яратилишига эмас, балки уларнинг бутун дунё бўйлаб қанчалик тенг тақсимланишига боғлиқлигини билдирганди.

Фото: EPA

Янги турдаги коронавирусга қарши вакцина камида 18 ойдан кейин пайдо бўлади, деди Франция олий таълим ва илмий тадқиқотлар вазири Фредерик Видаль.

Аввалроқ АҚШ президенти Дональд Трамп коронавирусга қарши вакцина 2020 йил охирида ёки ундан ҳам олдинроқ пайдо бўлишини айтганди.

Фредерик Видаль вакцинани бундай эрта муддатда яратиш мумкинлиги тўғрисида унда ҳеч қандай маълумот йўқлигини айтди.

"Вакцина яратиш устидаги тадқиқотлар одатда бир неча йил давом этади. Лабораториялар ва тадқиқотчилар вакцинани яратиш ва клиник тадқиқотлар борасидаги ишларни тезлаштириш унинг 18 ойдан кейин пайдо бўлишига умид бермоқда. Аммо инсонлар ҳаётини хавф остига қўйган ҳолда бу ишни янада тезлаштириш оқилона фикр эмас", - деди у Europe 1 радиостанцияси эфирида.

5 май куни Германия ва нидерландиялик олимлар коронавирусни енга олувчи тажрибавий моноклон антитанани олишгани маълум қилинганди.  

Жаҳон соғлиқни сақлаш ташкилоти коронавирусга қарши курашдаги муваффақият керакли дори воситаларининг қанчалик тез яратилишига эмас, балки уларнинг бутун дунё бўйлаб қанчалик тенг тақсимланишига боғлиқлигини билдирганди.

АҚШнинг соғлиқни сақлаш соҳасидаги мутахассислари ҳам коронавирусга қарши вакцина энг яхши вазиятда 12-18 ой ичида тайёр бўлиши мумкинлигини айтишган.

Top