Qishloq xo‘jaligi ekinlari uchun genetik bank yaratiladi

Vazirlar Mahkamasining 13.05.2020 yildagi «Qishloq xo‘jaligi ekinlari navlarini sinash markazi faoliyatini takomillashtirish, qishloq xo‘jaligi o‘simliklari turlarining Milliy genbankini yaratish to‘g‘risida»gi 282-son qarori qabul qilindi.

Norma’ning yozishicha, Qishloq xo‘jaligi vazirligi huzuridagi Qishloq xo‘jaligi ekinlari navlarini sinash markazining vazifalari etib quyidagilar belgilandi:

qishloq xo‘jaligi ekinlari, navlari va duragaylari sinovini xalqaro standartlar darajasiga yetkazish;

qishloq xo‘jaligi ekinlari yangi navlari bo‘yicha seleksiya yutuqlarining patentga layoqatliligini ekspertizadan o‘tkazish;

sinash ishlariga resurs tejovchi va innovatsion texnologiyalarni joriy etish;

nav sinash stansiyalari va laboratoriyalarning moddiy-texnika bazasini mustahkamlash.

Qaror bilan Milliy genetik bank yaratish bo‘yicha chora-tadbirlar dasturi tasdiqlandi.

O‘simlikshunoslik ilmiy-tadqiqot institutining negizida O‘simliklar genetik resurslari ilmiy-tadqiqot instituti tashkil etiladi.

Hujjat 14.05.2020 yildan kuchga kirdi.