8 iyundan o‘nta telekanalda «Sabru sadoqat» seriali namoyishi boshlanadi

Serial atoqli yozuvchi Said Ahmad va uning rafiqasi, shoira Saida Zunnunovaning hayotida 1950-1955 yillarda ro‘y bergan voqealarga asoslangan.

Bu davrda yosh oilaning yorqin umidlar va ulkan rejalarga to‘la baxtli va beg‘ubor hayoti bir onda ostin-ustun bo‘lib ketadi, Said Ahmad hibsga olinadi.

Endi bosh qahramonlarning hayoti qanday kechadi, ularni qanday sinovlar kutib turibdi, taqdir ularning muhabbatini qanday sinaydi? Serialni tomosha qilib, bu savollarning barchasiga javob topasiz.

«Avvaliga «Said bilan Saida» filmida, so‘ngra «Sabru sadoqat» serialida aks etgan voqealar haqiqatan ham Stalin qatag‘onining og‘ir yillarida ota-onam – O‘zbekiston xalq yozuvchisi Said Ahmad va shoira Saida Zunnunovaning hayotlarida yuz bergan, — deydi ssenariy muallifi, Said Ahmadning qizi Nodira Husanxo‘jayeva. — Filmga otamning avtobiografik qissalari, ota-onamning bir-biriga yo‘llagan maktublari hamda onam, shoira Saida Zunnunovaning kundaliklari asos qilib olingan. Ota-onamning hayoti va ijodi bilan bog‘liq barcha qo‘lyozmalar, hujjat va xatlar uy arxivimizda avaylab saqlanmoqda. Otamning 100 yillik yubileyiga atab «O‘zbekkino»da yaratilgan ushbu serial O‘zbekiston telekanallarida namoyish etilishidan bag‘oyat xursandman».

«Said bilan Saida» filmi asosida yaratilgan serial teletomoshabinlarni o‘sha tarixiy davrga, ijod va ilhom muhitiga yetaklaydi. Sevgi, xiyonat, pushaymonlik, kechirimlilik, sadoqat, ezgulik — tomoshabinlar film qahramonlari bilan birga ularning ko‘nglidan o‘tgan barcha kechinmalarni his qiladilar.

Ta'kidlash lozimki, O‘zbekiston prezidenti Shavkat Mirziyoyev «Adiblar xiyoboni»ning ochilishi chog‘ida mumtoz asarlarni o‘rganish, ularning hayoti va ijodiy yo‘li haqida kitoblar nashr etish, filmlar yaratish muhimligini ta'kidlab o‘tgan edi. Ushbu ko‘rsatmaga muvofiq, Milliy agentlik tomonidan «Sabru sadoqat» teleserialining tayyorlanishi, o‘zbek xalqining yosh avlodini tarbiyalashdek muhim vazifaga hissa qo‘shayotganidan darak beradi.

Kinoserial 8 iyundan 12 iyungacha yurtimizning «Oʻzbekiston», «Madaniyat va maʾrifat», «Mahalla», «Oʻzbekiston tarixi», «ZO’R TV, «MY5», «Milliy TV», «Uzbekistan-online.uz», «Sevimli TV» (9-13 iyun),  telekanallarida, shuningdek 20 iyun kuni «Kinoteatr» telekanalida namoyish etiladi.

Rustam Iqbol

Reklama huquqi asosida