Eron sog‘liqni saqlash vazirligi mamlakatdagi har beshinchi fuqaro koronavirus yuqtirgan bo‘lishi mumkinligini bildirdi

Fevraldan buyon 15 mln nafar eronlik yoki mamlakatning har beshinchi fuqarosi koronavirus yuqtirgan bo‘lishi mumkin. Mamlakat sog‘liqni saqlash vazirligi ana shunday taxminni bildirdi.

Bu haqda Eron sog‘liqni saqlash vazirligida koronavirusga qarshi kurashish uchun tuzilgan maqsadli guruh a'zosi Ehson Mustafoviy ma'lum qildi.

Uning so‘zlariga ko‘ra, u holda mamlakatda virus ta'siridan vafot etish darajasi aslida ancha past bo‘ladi.

Eron sog‘liqni saqlash vazirligi matbuot kotibi Sima Saodat Larining ma'lum qilishicha, mamlakatda 8,4 ming kishi koronavirusdan vafot etgan. Kasallikka chalinish bilan bog‘liq holatlar soni 175 927tani tashkil etmoqda.