Elektr uchun to‘lovlarni uyma-uy yurgan holda undirish amaliyotiga qaytiladi

«Bu bir tizim tugab, ikkinchi tizimga o‘tiladi degani emas. Ma'lum funksiyalargina – qarzdorlik to‘lovlarini ofis xodimlari emas, balki tashqarida faoliyat yurituvchi xodimlar tashkilotma-tashkilot, uyma-uy yurgan holda undirishi belgilanmoqda.

Majburiy ijro byurosi elektr energiyasi iste'moli uchun to‘lov undirgan vaqtida ham to‘lov hisob-kitobi bilan shug‘ullanmagan. Iste'mol hisob-kitobi hududiy elektr tarmoqlari orqali amalga oshirilgan. MIB faqatgina ma'lumotlar bazasi bilan bog‘langan holda nazorat va monitoringni amalga oshirar, qarzdorlik holatlari bilan shug‘ullanardi», deya Xo‘jayevning so‘zlarini keltirmoqda Kun.uz muxbiri.

Vazirlik vakili elektr energiyasi iste'moli uchun to‘lovlarni amalga oshirishning elektron tizimlarini takomillashtirish zaruratiga to‘xtalib o‘tdi.

«Elektr energiyasi iste'moli uchun to‘lov madaniyatini shakllantirishda elektron to‘lov tizimlarini nafaqat son jihatdan ko‘paytirish, balki ularning samaradorligiga odamlarni ishontirish ham kerak. Hududiy elektr tarmoqlari bo‘limlariga o‘zim borib to‘layman, to‘lov kvitansiyasini bergandan keyingina ishonaman, elektron tizimlarga ishonmayman, degan fikr bilan yurganlar hali ham bor.

Elektron to‘lov tizimlari ishonchliligini targ‘ib qilish barobarida, ularni takomillashtirish ham kerak. Pulning o‘rtada yo‘qolib qolish ehtimolini bartaraf etish, oxirgi marta qachon to‘lov amalga oshirilgani, to‘lovni amalga oshirish uchun qancha muddat qolgani haqida bildirishnoma berish funksiyalari kiritilishi lozim. Ya'ni iste'molchi shaxsiy kabinetga kirib, ma'lumotlarni olib, elektron to‘lov tizimiga o‘tishi emas, barcha funksiyalarni yagona tizimda osongina amalga oshira olishi lozim», dedi Sherzod Xo‘jayev 22 iyun kungi matbuot anjumanida.

Eslatib o‘tamiz, «Tabiiy gaz va elektr energiyasini sotish mexanizmini takomillashtirish bo‘yicha qo‘shimcha chora-tadbirlar to‘g‘risida» prezident farmoni bilan, 1 avgustdan boshlab elektr va gaz energiyasi iste'moli uchun to‘lov undirish vakolati Energetika vazirligi tizimiga o‘tkaziladi.