Buyuk Britaniya Huawei’ga 2027 yilgacha mamlakatda 5G tarmoqlari o‘rnatishni taqiqladi

Raqamlashtirish, madaniyat, OAV va sport vaziri Oliver Doudenning so‘zlariga ko‘ra, 5G tarmog‘ini ishga tushirish 2-3 yilga kechiktiriladi va bu qo‘shimcha 2 mlrd funt sterlingga tushadi.

Foto: Reuters

Buyuk Britaniya bosh vaziri Boris Jonson va vazirlar kengashi Xitoyning Huawei kompaniyasiga 2027 yilgacha mamlakatda 5G tarmoqlari o‘rnatishda qatnashishni taqiqladi. Bu haqda Sky news telekanali xabar berdi.

Ushbu qaror Buyuk Britaniya milliy xavfsizlik kengashi yig‘ilishida qabul qilingan.

Telekanalning qayd etishicha, bunday qaror qabul qilinishiga AQShning may oyida Huawei’ga qarshi joriy etgan sanksiyalari ta'sir ko‘rsatgan.

Raqamlashtirish, madaniyat, OAV va sport vaziri Oliver Doudenning so‘zlariga ko‘ra, 5G tarmog‘ini ishga tushirish 2-3 yilga kechiktiriladi va bu qo‘shimcha 2 mlrd funt sterlingga tushadi.

Bunga javoban Huawei Britaniya hukumatini ushbu qarorni qayta ko‘rib chiqishga chaqirdi va London Vashingtonning bosimiga dosh berolmaganini bildirdi.

Iyun oxirida Huawei Buyuk Britaniyada ilmiy-tadqiqot markazi qurishi xabar qilingandi.