17 iyul kuni Qirg‘iziston prezidenti Sooronboy Jeenbekov respublika transport va yo‘llar vaziri Janat Beyshenov bilan onlayn muloqot o‘tkazdi.
Qirg‘iz respublikasi davlat rahbari axborot siyosati bo‘limi xabar qilishicha, Transport va yo‘llar vaziri Janat Beyshenov ichki yo‘llarni loyihalashtirish va qurish, rekonstruksiya qilish, mamlakatning yirik avtoyo‘llarini qurish bo‘yicha axborotlarni taqdim qilgan. Vazir, shuningdek, “Xitoy-Qirg‘iziston-O‘zbekiston” temir yo‘li loyihasi bo‘yicha qurilishning borishi to‘g‘risida ham ma'lumot taqdim etgan.
Sooronbay Jeenbekov “Xitoy-Qirg‘iziston-O‘zbekiston” temir yo‘li loyihasini amalga oshirish ahamiyatiga alohida urg‘u berib, bu bo‘yicha barcha tomonlarning siyosiy qarorlari qabul qilinganini eslatdi.
“Bizning dengizga chiqish imkonimiz yo‘q. Pandemiya sharoitida yanada qamalib qoldik. Chegaralar yopildi, nafaqat iqtisodiy, balki oziq-ovqat xavfsizligi borasida ham xavotirlar paydo bo‘ldi. Aholini birinchi galda zarur mahsulotlar bilan ta'minlash masalasi kun tartibiga chiqmoqda. Shuning uchun mamlakatning tranzit salohiyatini ko‘tarish juda muhim hisoblanadi, “Xitoy-Qirg‘iziston-O‘zbekiston” temir yo‘li loyihasi bizga havodek zarur”, - degan Jeenbekov.
Prezident bu yo‘nalishda uzluksiz ishni tashkil etish zarurligini ta'kidlab, vazirlikning “Qirg‘iz temir yo‘li” milliy kompaniyasi ustidan nazoratini kuchaytirish kerakligini qayd etdi.
