22:55 / 20.07.2020
25524
АҚШ Давлат департаменти Қодировни қора рўйхатга киритди — У пулемёт кўтариб жавоб берди

Майк Помпео Чеченистон раҳбарини инсон ҳуқуқларини бузиш, жумладан қотилликларда айблаган. Рамзон Қодиров ва унинг оиласига АҚШга кириш тақиқланди.

Рамзон Қадиров. Фото: Чечен Республикаси раҳбари адиминистрацияси

АҚШ Давлат департаменти Россия Федерацияси таркибидаги Чеченистон Республикаси раҳбари Рамзон Қодировни «инсон ҳуқуқларини қўпол равишда поймол этгани» учун қора рўйхатга қўшган. Бу ҳақда давлат котиби Майк Помпео хабар берган.

«Департамент ўн йилдан кўпроқ муддат аввал Қодиров томонидан қийноқлар ва судсиз қатл қилишлар билан боғлиқ инсон ҳуқуқларининг кўп сонли бузилишларига доир ишончли маълумотларга эга», — деб қайд этган Помпео.

Унинг сўзларига кўра, санкциялар Чеченистон раҳбарининг рафиқаси Медни Қодирова ва қизлари Ойша ва Хадичага ҳам таъсир қилади. АҚШ ўзи билан маслакдош давлатлар худди шундай санкциялар жорий қилишларига эришмоқчи.

Давлат департаменти баёнотида Қодиров коронавирус пандемиясини ёритаётган икки журналистга ҳам таҳдид қилгани айтилган. Бундан ташқари, АҚШ ташқи сиёсат идораси «Россия федерал ҳокимиятининг пандемияга қарши чоралари танқидий руҳда ёритилаётган мақолаларни цензурага тортаётганлиги»ни қоралаган.

Санкция ҳақидаги хабарларга жавобан Рамзон Қодиров ўзининг Telegram каналида жавоб қайтарган. У қурол тўла хонада қўлида иккита пулемёт кўтарганча тушган суратини жойлаган. Иллюстрация остига тагсўз ҳам битилган: «Помпео, биз жангни қабул қилдик! Энди янада қизиқроқ бўлади!»

Рамзан Кадыров. Фото: t.me/Kadyrov_95

«Калибр» спорт мажмуасининг спортча отиш машқлари бўйича мураббийи Сергей Солдецкийнинг РБКга айтишича, Қодиров қўлларида Калашниковнинг модернизация қилинган пулемётларини ушлаб турибди.

Чеченистон етакчисига нисбатан санкциялар жорий этилганини Россия ТИВ расмий вакили Мария Захарова аллақачон изоҳлаган. «Бунга мос жавоб бериш қийин бўлади, лекин нимадир ўйлаб топамиз», — деб ёзган у Facebook’да.

2019 йил апрелда АҚШ Чеченистон ҳукумати раиси Муслим Хучиевга ҳам мамлакатга киришни тақиқлаб қўйган эди. Америка ҳукумати уни маҳаллий қийноқларга дахлдор деб ҳисоблайди. Хучиевнинг рафиқаси Сапият Шабазова ҳам чеклов остига тушган.

Россия ташқи ишлар вазирлиги ўшанда «бу қадам ташаббускорлари Россиянинг ушбу ҳудуди вакилларига нисбатан яна асосланмаган айбловларни ишга солди», деб баёнот берган эди. Қодиров ўшанда АҚШга кира олмасликдан Хучиевга «иссиқ ҳам, совуқ ҳам» бўлмаслигини айтган эди.

Ўша йилнинг декабрида инсон ҳуқуқлари бузилиши юзасидан санкциялар Грозний шаҳри бўйича ИИВ бошқармаси бошлиғи Аслан Ирасхановга нисбатан ҳам қўлланилган эди. АҚШдагилар аввалроқ Аҳмат Қодиров номидаги патруль-пост бўлинмаси қўмондони лавозимида ишлаган Ирасханов 27 кишининг ўлимига жавобгар деб ҳисоблашади. 

Top