Xorazmda avtomobiliga o‘zboshimchalik bilan mayoqcha o‘rnatib olgan 21 yoshli yigit jazolandi

20 iyul kuni ijtimoiy tarmoqlarda «Xorazmlik shovvoz yigitni syurpriz kutmoqda» nomi ostida videolavha tarqaldi. Unda «Jyentra» rusumli avtomobiliga miltillovchi maxsus mayoqchani o‘rnatib olgan yigit tasvirlangan edi, deb xabar beradi Xorazm viloyati IIB axborot xizmati.

Aniqlanishicha, bu yigit Qo‘shko‘pir tumanida yashovchi, 1999 yilda tug‘ilgan, fuqaro A.X. bo‘lib, u 19 iyul kuni kechki paytda o‘zining boshqaruvidagi 90J711CA davlat raqam belgili «Jyentra» rusumli avtomashinasiga o‘zboshimchalik bilan miltillovchi mayoqcha o‘rnatgan va undan foydalanib, avtomobilini boshqarib yurgan.

«Bundan tashqari, videolavhada haydovchining boshqaruv paytida xavfsizlik kamaridan ham foydalanmagani aks etgan.

Shundan so‘ng, yo‘l-patrul xizmati inspektori 20 iyul kuni haydovchining yashash manziliga borgan va qoidabuzarlik yuzasidan tegishli tartibda dalolatnoma va ma'muriy bayonnomani rasmiylashtirgan. Shuningdek, avtomobilga o‘rnatilgan mayoqcha olib tashlanib, huquqbuzarlik bartaraf etilgan», – deyiladi xabarda.

Rasmiy axborotda fuqaroga qanday jazo tayinlangani ochiqlanmagan.

Ma'lumot uchun, MJtKning 127-moddasiga asosan, tegishli ruxsat olmay turib transport vositalariga tovush chiqaruvchi va yorituvchi maxsus qurilmalarni o‘rnatish — ana shu qurilmalarni musodara qilib, fuqarolarga BHMning 1 baravaridan 3 baravarigacha, mansabdor shaxslarga esa 3 baravaridan 5 baravarigacha jarima solishga sabab bo‘ladi.