Italiyada koronavirus bilan bog‘liq favqulodda vaziyat rejimi oktabr o‘rtasigacha uzaytirildi 

G‘arb OAVning xabar berishicha, Italiya parlamentining quyi palatasi – Deputatlar palatasi favqulodda vaziyat uzaytirilishi uchun ovoz bergan. Parlamentning yuqori palatasi – senat esa bunga bir kun avval ovoz bergan edi. Italiya bosh vaziri Juzeppe Konte favqulodda vaziyat rejimi uzaytirilishi yangi cheklovlar joriy qilinishini anglatmasligini ma'lum qilgan.

“Afsuski, joriy pandemiya nazorat ostiga olingan bo‘lsa-da, to‘liq tugamadi”, deb aytgan Konte. 

Mamlakatda favqulodda vaziyat rejimi 31 iyulda tugashi kerak edi. Ushbu rejim birinchi navbatda hukumatga zilzilalar, toshqinlar va boshqa falokatlar vaqtida qarorlar qabul qilishni tezlashtirish imkonini beradi.  

Oxirgi ma'lumotlarga ko‘ra, Italiyada koronavirus yuqtirish holatlari 246 mingdan oshgan, 198 mingdan ortiq bemor tuzalgan, 35 mingdan ko‘proq kishi vafot etgan.