Qozog‘istonda karantin yana 2 haftaga uzaytirildi

Qayd etilishicha, bosh vazir Asqar Mamin prezidentga shu yil 5 iyuldan boshlab qattiq karantin choralari ko‘rilganidan keyin koronavirus bilan kasallanish holatlari soni 29 foizga kamayganligini ma'lum qildi. 

Kasallikka chalinganlar soni kuniga 1500-1600 kishi darajasida barqarorlashdi. Kasalxonalardagi yuklama 43 foizga, reanimatsiya bo‘limlarida 27 foizga kamaydi. Sog‘ayib ketganlar soni 63 foizga oshdi, tez yordam chaqiruvlari kamaydi. Shu tariqa, sog‘liqni saqlash tizimidagi yuklamaning asosiy ko‘rsatkichlari kamaytirildi.

Shuningdek, Asqar Mamin davlat rahbariga kasallanish va o‘lim holatlari, tibbiy yordamning mavjudligi va sifati, aholini testdan o‘tkazish ko‘rsatkichi, reanimatsiya va intensiv terapiya bo‘limlarini dori-darmon hamda zarur tibbiy uskunalar bilan ta'minlash kabi muhim jihatlar bo‘yicha hududlardagi vaziyat kunlik monitoring qilinayotganini xabar berdi.

Sog‘liqni saqlash vaziri Aleksey Tsoy prezidentga infratuzilma obektlarining epidemiologik vaziyat va iqtisodiyotga ta'sirini hisobga olgan holda, karantin tadbirlarini bosqichma-bosqich yumshatish uslublari to‘g‘risida xabardor qildi.

Davlat rahbari koronavirus infeksiyasidan kasallanish va o‘lim holatlari ko‘rsatkichini yanada kamaytirish muhim ahamiyatga ega ekanligini ta'kidladi.

Iyul oyida joriy etilgan cheklov choralarining ijobiy ta'sirini yanada kuchaytirish maqsadida va Qozog‘iston hamda qo‘shni davlatlarda epidemiologik vaziyat murakkablashishi mumkinligini hisobga olgan holda, Qosim-Jomart To‘qayev davlat komissiyasiga karantin tadbirlarini ikki haftaga uzaytirish, so‘ngra bosqichma-bosqich yumshatish to‘g‘risida topshiriq berdi.