09:31 / 02.08.2020
7805
ЖССТ пандемия билан боғлиқ халқаро фавқулодда режимни яна 3 ойга узайтирди

Жаҳон соғлиқни сақлаш ташкилоти коронавирус пандемияси билан боғлиқ ҳолда киритилган халқаро фавқулодда вазият режимини яна 3 ойга узайтирди. Бу ҳақда ЖССТнинг фавқулодда вазиятлар бўйича қўмитаси ўз йиғилиши якунларига кўра маълум қилди.

Қўмита аъзолари пандемия ҳали ҳам жамоат саломатлиги учун фавқулодда вазиятни билдиришига бир овоздан рози бўлган.

Қўмита ЖССТ бош директори Тедрос Аданом Гебрейесусга ушбу режимни узайтиришни тавсия қилган. Гебрейесус ўз навбатида бунга рози бўлган. Шу муносабат билан “қўмита бош директор қарори билан яқин 3 ой давомида яна чақиртирилади”.

ЖССТ раҳбари йиғилишда янги пандемия ўзидан “100 йилда бир марта юз берадиган инқирозни акс эттиришини, унинг оқибатлари яна ўнлаб йиллар давомида сезилишини” таъкидлаб ўтган. 

Гебрейесуснинг айтишича, айни вақтда “кўплаб масалалар ҳал қилинган, бироқ ҳали ўз ечимини кутаётган талайгина масалалар бор”. ЖССТда иммунитетни ўрганиш бўйича мавжуд бўлган маълумотларга кўра, сайёра аҳолисининг аксарияти, ҳаттоки вируснинг жиддий авж олишини бошдан кечирган ҳудудлардаги аҳоли коронавирусга чалинишга мойил бўлиб қолмоқда.  

Қўмита ЖССТга пандемияга қарши курашга халқаро ва минтақавий ташкилотларни “мувофиқлаштириш ва сафарбар қилишни”, давлатларга коронавирусга қарши курашда ёрдам беришни ва коронавируснинг келиб чиқишини аниқлаш учун олиб борилаётган илмий тадқиқотларни тезлаштиришда кўмак беришни давом эттиришни тавсия қилган. 

Бу йиғилиш ЖССТнинг 18 эксперт ва 13 маслаҳатчидан иборат фавқулодда вазиятлар бўйича қўмитасининг пандемия бошидан бери 4-йиғилиши бўлди. Ундан мақсад дунёда пандемияга қарши курашнинг жорий ҳолатини баҳолаш ва вирус тарқалишига қарши самарали курашиш бўйича тавсиялар ишлаб чиқишдан иборат. Аввалги йиғилишлар 22-23 январь, 30 январь ва 30 апрелда бўлиб ўтганди. 

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top