Italiyada koronavirusga chalinganlar rasmiy ko‘rsatkichdan 6 marta ko‘pligi ma'lum qilindi

Italiyada fevraldan iyun oyigacha 1,5 mln kishi koronavirusni boshdan o‘tkazgan. Bu esa avval hisoblangandan ko‘ra 6 marta ko‘proqni tashkil qiladi, deb yozmoqda mamlakatda o‘tkazilgan tadqiqotga tayanib Corriere della Sera nashri.

Foto: Reuters

Koronavirusga chalinganlarning rasmiy ko‘rsatkichi bilan bunday katta tafovut kasallanganlar haqida ma'lumotlar faqat tahlillar natijalariga ko‘ra olingani bilan bog‘langan. Shifokorlar tadqiqot yordamida qancha italiyalikda koronavirusga qarshi antitanalar borligini tekshirishga qaror qilishgan. Organizmda antitanalar mavjudligi inson oxirgi oylarda koronavirusga chalinib, undan immunitet hosil qilganini ko‘rsatadi.

Qon zardobi o‘rganilgan tadqiqotda 65 ming kishi ishtirok etgan. So‘ngra tadqiqotchilar mamlakatda koronavirus bilan bog‘liq vaziyat haqida ma'lumot olish uchun proporsiya hosil qilishgan. Natijada 2,5 foiz italiyalikda koronavirusga antitana borligi aniqlangan.

Italiya Yevropaning koronavirusdan eng ko‘p jabr ko‘rgan davlatlaridan biri sanaladi. Mamlakat shimolida bahorda ayniqsa og‘ir vaziyat kuzatilgan.