Ozarboyjonlik erkak pul ishlash uchun Olmaotada o‘zining o‘g‘irlanishini sahnalashtirdi

Ozarboyjon fuqarosi Olmaotada o‘zining o‘g‘irlab ketilishini sahnalashtirganlikda gumon qilinmoqda, deb xabar berdi Qozog‘iston IIV matbuot xizmati.

Politsiyaning ma'lumot berishicha, 37 yoshli erkak Nursultondagi biznesmen hamkoriga "odam o‘g‘rilari" nomidan  o‘zining qonga bo‘yalgan fotosurati va 100 ming dollar talab qilingan ovozli yozuv jo‘natgan.

Qozog‘istonlik tadbirkor politsiyaga murojaat qilgan va politsiya buning "o‘g‘irlab ketilgan erkak", uning jiyani va ikki tanishi qatnashgan tovlamachilik ekanligini aniqlagan.

"Suratda haqiqatan ham Ozarboyjon fuqarosi tasvirlangan, faqat uning kiyimidagi qon quyonning qoni bo‘lgan", - dedi shahar politsiya boshqarmasi boshlig‘i Yerkin Inkarov.

Ozarboyjon fuqarosi va uning sheriklari ijarada turgan xonadonidan topilgan.