AQSh qochqinlarni yana qabul qila boshladi

AQSh ma'muriyati mamlakatga kirishi ma'qullangan qochqinlarni yana qabul qilmoqda. Bu haqda davlat departamenti vakili ma'lum qildi.
 
“Bu dastur dunyodagi eng notavon qochqinlar uchun hayotiy ahamiyatga ega. Ularda boshqa chora yo‘q va ular pandemiya sababli yanada og‘ir ahvolga tushganlar”, deb aytgan AQSh vakili.  

AQSh davlat kotibi Mayk Pompeo qochqinlarni qabul qilishni 29 iyulda ma'qullagan.

“Iltimosi ma'qullangan qochqinlarni qabul qilish dasturi koronavirus bilan bog‘liq barcha xavfsizlik choralariga rioya qilingan holda 30 iyuldan o‘z ishini qayta boshladi”, deb ma'lum qilgan davlat departamenti vakili.

31 iyul holatiga ko‘ra, AQShga kirish huquqini 7905 kishi olgan. AQShda oktyabrda yakunlanadigan joriy moliyaviy yilda mamlakatga kelgan qochqinlar soni hukumat kutgandan kamroq bo‘ladi.

Avvalroq BMTning qochqinlar ishlari bo‘yicha oliy komissari boshqarmasi vakili Pablo Mateu koronavirus pandemiyasi sababli dunyoda muhojirlar va qochqinlar soni kamayganini ma'lum qilgan.