Rospotrebnadzor ko‘rshapalaklarda koronaviruslarni tekshirishni boshladi

“Rospotrebnadzorning Epidemiologiya ilmiy-tadqiqot instituti ilmiy xodimlari Rossiyaning turli hududlarida: Moskva shahri va Moskva viloyatida, Markaziy-Chernozyom mintaqasi va Janubiy federal okrugida (Voronej va Volgograd oblastlari, Krasnodar o‘lkasi) yashovchi ko‘rshapalaklarda koronaviruslar bor-yo‘qligini bilish bo‘yicha katta ko‘lamli tadqiqotlar olib bormoqda”, deb ma'lum qilingan xabarda.

Tashkilotda ko‘rshapalaklarning turfa xil turlarida koronaviruslar uchrashini baholash, ularda topilgan viruslarning ma'lum bo‘lgan viruslar bilan yaqinligi darajasini aniqlash, hayvonlar o‘tkazuvchi koronaviruslar biologik turfa xilligi haqida ma'lumotlar olishni rejalashtirgan. Shuningdek, ko‘rshapalaklar harakatlanishi xaritasini tahlil qilish va viruslar tarqalishi yo‘llarini baholash ko‘zda tutilgan. Tadqiqotlar olimlarga ehtimoliy epidemik xatarlarni aniqroq va to‘laroq baholashda yordam beradi.

Olimlarning ma'lum qilishicha, ular shu maqsadda bir qator hududlarda, jumladan, Moskva, Voronej va Volgograd oblastlari, Qora dengiz sohillarida ko‘rshapalaklardan ko‘p miqdorda biologik namunalar to‘plashgan. Ko‘rshapalaklardan namunalar olingach, ular qo‘yib yuborilgan. Hammasi bo‘lib 1,5 mingtadan ko‘proq ko‘rshapalakni o‘rganish rejalashtirilgan.

Yangi turdagi koronavirus bilan kasallanishning ilk holatlari Xitoyning Uhan shahrida qayd etilgandi. Virusning tarqalish o‘chog‘i yovvoyi hayvonlar sotiladigan mahalliy bozor bo‘lgani taxmin qilinib kelinadi, biroq buning aniq isboti yo‘q va koronavirus manbasi hali topilmagan. JSSTning taxmin qilishicha, koronavirus odamlarga hayvonlardan yuqqan va virusning dastlabki manbasi ko‘rshapalaklar bo‘lgan.