Koreya prezidenti shifokorlarning ish tashlashini askarlarning jang maydonini tashlab qochishiga qiyosladi

Janubiy Koreya prezidenti Mun Chje In tibbiyot xodimlarining ish tashlashlariga nisbatan keskin javob qaytarilishini va'da qildi. 

"Shifokorlarning yirik pandemiya vaziyatida ishlashdan bosh tortishlari askarlarning jang vaqtida qochishlari bilan barobar", - ta'kidladi Mun Chje In.

U shifokorlar yaqin vaqt ichida ishga qaytishiga umid bildirdi, shu bilan birga ularga nisbatan qonun doirasida keskin choralar ko‘rilishini tasdiqladi.

Chorshanba kuni mamlakat hukumati klinik shifoxonalar xodimlari ishga qaytishlari shartligi to‘g‘risida qaror chiqardi.

Janubiy Koreya shifokorlari hukumat taklif etgan sog‘liqni saqlash sohasidagi islohotlarga qarshi chiqishmoqda. Islohotlarda tibbiy o‘quv muassasalariga qabul kvotalarini oshirish ko‘zda tutilgan. Ish tashlash qilayotganlar shifokorlar sonining ko‘payishi raqobatni kuchaytirishi va daromadlarning pasayishiga olib kelishidan xavotirlanmoqda.

Oxirgi ma'lumotlarga ko‘ra, Janubiy Koreyada koronavirusga chalinganlar soni 18,7 mingdan oshgan, 313 kishi vafot etgan.