Jyenevada dunyo bo‘yicha eng yuqori qiymatdagi eng kam ish haqi to‘lanadi 

Shveytsariyaning Jyeneva kantonida eng kam ish haqi (EKIH) kiritilishi aholi tomonidan qo‘llab-quvvatlandi. Ushbu kantonda 17 oktyabrdan EKIH soatiga 23 shveysar franki (25 dollar) yoki yiliga 49 ming frank (53,4 ming dollar) miqdorida o‘rnatiladi. Bu esa dunyodagi eng yuqori EKIH bo‘ladi.  

EKIHning kiritilishi Jyenevada 2 marta – 2011 va 2014 yillarda ovozga qo‘yilgan, biroq o‘shanda aholi bunga qarshi chiqqan. Endi esa ushbu tashabbusni 54 foiz aholi qo‘llab-quvvatlagan. Aholining bu boradagi fikri o‘zgarishi pandemiya va ertangi kunga ishonchi yo‘qolgani bilan bog‘lanmoqda.  

Ma'lumotlarga ko‘ra, shveysariyaliklarning o‘rtacha yillik daromadi 57,4 frankni (62,6 ming dollar), Jyenevada bir kishining yashashi qiymati (uy-joy ijarasisiz) yiliga 17,3 ming frankni (18,9 ming dollar) tashkil qiladi. Shahar markazida bir xonali kvartiraning ijara haqi esa yiliga 21 ming frank atrofida (22,9 ming dollar) turadi.