20:50 / 06.10.2020
1988
SpaceX олтинчи уринишда Starlink тизими сунъий йўлдошларини орбитага учира олди 

SpaceX компанияси олтинчи уринишда Starlink лойиҳасининг навбатдаги 60 та сунъий йўлдошини орбитага учира олди. Бу компаниянинг сунъий йўлдошлар гуруҳини орбитага 13-марта жўнатишидир. 

Фото: SpaceX

Ушбу миссия турли сабабларга кўра бир неча марта қолдирилди. Жумладан, уринишлардан бири ракета стартига 18 сония қолганда бекор қилинган.

Аввалги 60 та сунъий йўлдош орбитага 3 сентябрда учирилган. Эндиликда лойиҳанинг орбитада жойлаштирилган сунъий йўлдошлари сони 773 тага етди.

Сунъий йўлдошлар орбитага АҚШнинг Шарқий соҳилбўйи вақти билан соат 07:29да Флоридадаги космодромдан Falcon 9 ракетасида учирилган.

Ракета учирилгандан бир соатдан сал кўпроқ вақт ўтгач барча сунъий йўлдошлар бир вақтда орбитага чиқарилган. 

Айни вақтда SpaceX дунёдаги энг йирик сунъий йўлдош оператори ҳисобланади. SpaceX’да Ер сиртини Starlink тизими сигнали билан минимал қоплаш учун 420 та, ўртача даражада қоплаш учун 780 та сунъий йўлдош талаб этилиши айтилган. Компания жорий йил охиригача тизимни Канада ва АҚШнинг шимолий ҳудудлари учун ишга туширишни мўлжалламоқда.

Сентябрь бошида SpaceX тизимнинг синови натижалари билан бўлишган. Компанияда сунъий йўлдошлар маълумотларнинг 100 Мбит/сониядан каттароқ тезлик билан юкланишини таъминлагани, тизимда интернетга уланиш кам вақт олиши эса энг замонавий онлайн-ўйинларни ўйнаш имконини бериши маълум қилинган.

Top