«Qizil» hudud deb topilgan Furqat tumanida ham hokim va sektor rahbarlari uzr so‘radi

6 oktyabr' kuni Xalq deputatlari Furqat tumani kengashining 13-sessiyasi bo‘lib o‘tdi. Unda tumanni 2020–2021 yillarda kompleks ijtimoiy-iqtisodiy rivojlantirish orqali «qizil hudud»dan chiqarish choralari haqida so‘z bordi.

Tuman hokimi – kengash raisi Dilmurod Soliyev kun tartibidagi masala yuzasidan hisobot berdi va tumanni «qizil» hududdan chiqarish bo‘yicha ishlab chiqilgan «Yo‘l xaritasi»ni taqdim etdi.

Hokimning aytishicha, tumanda past ko‘rsatkichlar qayd etilgan 6ta yo‘nalish – iqtisodiy rivojlanish va samaradorlik, mehnat bozorining samaradorligi, iqtisodiyot raqobatbardoshligi diversifikatsiyasi ko‘rsatkichlari, ishbilarmonlik muhiti va tadbirkorlikni rivojlantirish, mahalliy soliqlarni yig‘uvchanligi kabi yo‘nalishlarda maxsus chora-tadbirlar ishlab chiqilgan.

Dastur bo‘yicha aniq vazifalar belgilangani aytildi. Masalan, tumandagi 4ta sektor hududlarida kichik sanoat zonalarini tashkil etish orqali 500dan ziyod yangi ish o‘rinlarini yaratish va bu orqali mahalliy budjetga qo‘shimcha tushum tushirilishi reja qilingan.

Sessiyada hokim Dilmurod Soliyev boshchiligidagi sektor rahbarlari uzr so‘radi. Furqat tumanini «qizil hudud» toifasidan chiqarilishi uchun barcha imkoniyatlar safarbar etilishi ta'kidlandi.

Sessiyada Oliy Majlis Senatining Fan, ta'lim va sog‘liqni saqlash masalalalari qo‘mitasi raisi o‘rinbosari M.Parpiyev hamda Farg‘ona viloyati hokimi o‘rinbosari M.Ubaydullayevlar so‘zga chiqdi. Yakunda ko‘rilgan masala yuzasidan tegishli qaror qabul qilindi.