Shotlandiyaning Buyuk Britaniyadan mustaqil bo‘lishini rekord sondagi shotlandlar qo‘llab-quvvatlamoqda. Ipsos MORI o‘tkazgan so‘rovnomaga ko‘ra, 58 foiz shotlandlar mustaqillik uchun ovoz berishga tayyor.
Shu bilan birga 42 foiz shotlandlar Britaniya tarkibida qolish uchun ovoz berishlarini bildirishgan.
2014 yilda Shotlandiyaning mustaqilligi bo‘yicha o‘tgan referendumda mustaqillik tarafdorlari 45 foiz ovoz bilan yutqazishgan edi.
Shotlandiya mustaqilligini qo‘llab-quvvatlovchilar soni koronavirus pandemiyasi ortida ko‘paygan. Ko‘plab shotlandlarning fikricha, Edinburgdagi hukumat koronavirus inqiroziga qarshi Boris Jonson hukumatidan yaxshiroq kurashmoqda.
So‘rovnoma, shuningdek, shotlandlarning uchdan ikki qismi Shotlandiya yetakchi vaziri Nikola Starjyenga ijobiy, to‘rtdan uch qismi esa Britaniya bosh vaziri Boris Jonsonga salbiy munosabatda ekanini ko‘rsatgan.
Hozirda Shotlandiyada mustaqillik haqidagi referendumning yangi loyihasi tayyorlanmoqda. Biroq ushbu qonun loyihasi parlamentning keyingi chaqirig‘ida qabul qilinishi kutilmoqda.
