G‘afur G‘ulom istirohat bog‘i hududida turar joy inshootlari qurilmaydi - Madaniyat vazirligi

Ijtimoiy tarmoqlarda G‘afur G‘ulom nomidagi madaniyat va istirohat bog‘i hududi buzilib, o‘rniga turar joy majmuasi qurilayotgani haqida xabar tarqaldi.

Madaniyat vazirligining ma'lum qilishicha, bu asossiz xabar.

“Ya'ni chindan ham bog‘ hududida ish jarayoni boshlangan. Ammo turar joy majmualari qurilmayapti, aksincha, bog‘da yengil konstruksiyali inshootlarni buzish (demontaj) ishlari olib borilmoqda.

Ishlab chiqilgan yangi loyihaga ko‘ra, bog‘ hududida turar joy inshootlari qurilmaydi.

Shuningdek, obekt hududidagi texnik jihatdan eskirgan attraksion hamda o‘yin qurilmalarini olib chiqish bo‘yicha barcha tadbirkorlar ogohlantirilgan va ushbu talabga ular tomonidan e'tiroz bildirilmagan”, - deyiladi vazirlik rasmiy bildirishida.

Ta'kidlab o‘tilishicha, olib borilayotgan rekonstruksiya jarayonida bog‘ hududidagi suv havzasi, daraxtlar va boshqa o‘simliklarga ziyon yetmagan, ular doimiy ravishda parvarish qilinmoqda.