JSTTda pandemiya ustidan g‘alaba qozonish uchun vaksinaning o‘zi kamlik qilishi aytildi

“Pandemiya boshidan beri vaksina uni nazorat ostiga olish uchun hal qiluvchi ahamiyat kasb etishini bilgandik. Biroq aytish joiz, vaksina bizda mavjud boshqa dastaklarga qo‘shimcha bo‘ladi, biroq ularning o‘rnini bosmaydi”, deb yozgan JSST rahbari tvitterda.

Uning ta'kidlashicha, pandemiyani to‘xtatish uchun kuzatuv olib borish, testlar o‘tkazish, davolash, o‘zini yakkalash, karantin hamda odamlarni ogoh bo‘lishga chaqirishni davom ettirish lozim. 

“Koronavirusga qarshi vaksinalar dastlab cheklangan miqdorda yetkaziladi, bunda ustuvorlik tibbiy xodimlar, keksalar va aholining xavf guruhiga kiruvchi boshqa toifalariga beriladi”, deb qo‘shimcha qilgan Gebreyyesus.

“Bu, umid qilishimizcha, o‘limlar sonini kamaytirishda, sog‘liqni saqlash tizimiga o‘z vazifalarini uddalashda yordam beradi, biroq virus tarqalishi uchun baribir ko‘p imkon qoladi”, deb ogohlantirgan Gebreyyesus.

Ayni vaqtda dunyoda koronavirusga qarshi bir nechta vaksina ishlab chiqilgan. Ulardan ba'zilari sinovlarning yakuniy bosqichidan o‘tkazilmoqda. Jumladan, Rossiyaning koronavirusga qarshi birinchi vaksinasi “Sputnik V”ning samaradorligi 92 foizga baholangan, AQSh va Germaniyaning Pfizer va BioNTech kompaniyalari vaksinasi esa 90 foizdan ko‘proq, AQShning Moderna kompaniyasi vaksinasi esa 94,5 foiz samaradorlik ko‘rsatgan.