O‘zbekiston 750 mln dollarlik yevroobligatsiya chiqarmoqda. 2-transh ilk marta o‘zbek so‘mida bo‘ladi

O‘zbekiston hukumati London fond birjasida navbatdagi yevrobondlarni joylashtirmoqda. Bu gal AQSh dollari bilan birga, o‘zbek so‘mida ham denominatsiya qilingan xalqaro suveren obligatsiyalar chiqarilib, 750 mln dollar qarz jalb etiladi.

Investorlar takliflariga binoan, 750 mln AQSh dollari miqdoridagi suveren xalqaro obligatsiyalar 2 transhda – 10 yillik muddat bilan AQSh dollarida va 3 yillik muddat bilan o‘zbek so‘mida chiqariladi.

Moliya vazirligi xabariga ko‘ra, London fond birjasida joylashtirish bo‘yicha boshlang‘ich stavkalar mos ravishda 4,25 foiz atrofida va 15,25 foiz atrofida belgilangan.

«London vaqti bilan soat 09:00 da buyurtmalar kitobi ochiq deb e'lon qilindi. Kun davomidagi buyurtmalar kitobining hajmi va investorlarning takliflaridan hamda moliya bozorlaridagi holatdan kelib chiqib, O‘zbekiston Respublikasi suveren xalqaro obligatsiyalarining har ikki transhi bo‘yicha kupon stavkalarini belgilash jarayoni bugun (19 noyabr kuni) yakunlanishi kutilmoqda», – deyiladi xabarda.

Qayd etilishicha, xalqaro obligatsiyalarning milliy valutada chiqarilishi valuta xatarlarini kamaytirishga xizmat qilish bilan birga kelajakda ichki moliya bozoriga, jumladan davlat g‘aznachilik obligatsiyalari bozoriga xalqaro investorlarni jalb qilish uchun zamin yaratadi

17-18 noyabr kunlari roud-shou tadbirlari bo‘lib o‘tgan. Unda AQSh, Buyuk Britaniya, Daniya, Avstraliya va Birlashgan Arab Amirliklari kabi mamlakatlardan 90ga yaqin xalqaro investor ishtirokida audiokonferensiya (Global Investor Call) o‘tkazilgan; 15ga yaqin yirik xalqaro investorlar bilan yakkama-yakka formatda virtual uchrashuvlar tashkil etilgan.

Moliya vazirligi yevrobond joylashtirish shartlari bo‘yicha «Siti», «JP Morgan», «Societe Generale», «VTB Capital» va «Gazprombank» kabi moliyaviy konsultantlar – anderrayterlar bilan hamkorlikda ish olib borgan.

Iyun oyida moliya vaziri o‘rinbosari Odilbek Isoqov hukumat milliy valutada 500 million dollar ekvivalentidagi yevroobligatsiyalar chiqarishni rejalashtirayotganini ma'lum qilgandi. Shu bilan birga, vazirlik matbuot xizmati Kun.uz'ga 2030 yilgacha qarz portfelida so‘mdagi qarz ulushini 50 foizgacha oshirish nazarda tutilgani va tashqi bozorda yevrobond joylashtirish rejalashtirilmaganini bildirgandi.

Eslatib o‘tamiz, 2019 yilda O‘zbekiston o‘z tarixida birinchi marta umumiy qiymati 1 milliard dollarga teng ikkita yevrobondlar transhini joylashtirgan. Qarz obligatsiyalarining to‘lov muddati 2024 va 2029 yil fevral oylariga belgilangan.

#tashqi qarz #Moliya vazirligi #yevrobond