2021 yildan barcha hududlarda ikki bosqichli patronaj tizimiga o‘tiladi - vazir

«Bu bo‘yicha hozir biz ilgari olib borgan patronaj tizimini qayta ko‘rib chiqdik. Ilgarigi umumiy, maqsadsiz patronajning o‘rniga hozir ikki bosqichli patronaj tizimini ishlab chiqib, yo‘lga qo‘ydik va birinchi navbatda bu yalpi xatlov patronaji bo‘lib, bunda asosiy vazifa – nafaqat aholining kasallanish ko‘rsatkichlari, birinchi navbatda salomatlik ko‘rsatkichlarini belgilash.

Bunda o‘zimizning antropometrik o‘lchovlar, aholining ovqatlanish rejimi, sog‘lom turmush tarziga to‘g‘ri keladigan ko‘rsatkichlarni aniqlaymiz.

Ikkinchi yo‘nalish bu – ularning kasallanish ko‘rsatkichi. Ana shu asosida biz aholini 4ta xavf guruhiga bo‘lib olib, undan keyin har bir guruh bo‘yicha alohida ish olib boramiz.

Ikkinchi bosqichda maqsadli va manzilli patronaj tor mutaxassislarni jalb qilgan holda olib boriladi», – dedi vazir 2020 yil yakunlari bo‘yicha bergan intervyusida.

Uning ta'kidlashicha, mazkur shakldagi patronaj tizimi keyingi yilda barcha hududlarda yo‘lga qo‘yiladi.

«Hozirgi kunda prezident qarorlari asosida barcha hududlarimizda 26ta tuman va shahar belgilab olindi. Ularda ish boshlab yuborilgan. Shu yilning oxirigacha yakuniga yetkazilyapti.

Ulardan tashqari, davlat rahbari tashriflarida belgilangan, bu – Qashqadaryo va Xorazm viloyatlarida barcha fuqarolarni ana shu patronajdan o‘tkazishni amalga oshirib, hozirgi kunda nihoyasiga yetkazilyapti.

Keyingi yildan bu patronaj mamlakatimizning barcha hududlarida amalga oshiriladi va ikkinchi bosqichi – maqsadli, manzilli patronajga o‘tiladi. Bu – xalqimizning, har bir fuqaroning salomatligi to‘g‘risida to‘liq ma'lumotga ega bo‘lib, salomatligini saqlash, kerak bo‘lsa, tiklash uchun ish olib borishimizga imkoniyat yaratadi», – dedi vazir.