Paragvaylik sobiq futbolchi Xose Luis Chilavert mamlakat prezidentligi uchun saylovda o‘z nomzodini ilgari suradigan bo‘ldi. Bu haqda sobiq darvozabon o‘zining Tvitterdagi sahifasida ma'lum qildi.
«Qonunbuzarlikning jazolanmasligi, korrupsiya va talon-toroj qilishlari jonga tegdi. Chila – 2023 yilgi prezident! Paragvaylik bo‘lganim bilan faxrlanaman», deb yozgan Chilavert o‘z sahifasida.
— José Luis FelixChilavert Gonzalez (@JoseLChilavert_) December 24, 2020
Ma'lumot uchun, 55 yoshli Chilavert Paragvay milliy jamoasi safida 74 ta o‘yinda maydonga tushgan. U 1998 va 2002 yilgi jahon chempionatlarida o‘ynagan. Chilavert darvozabonlar uchun noodatiy tarzda to‘purarlik xususiyati bilan ajralib turgan. U faoliyati davomida 67 ta gol urgan.
Chilavert Ispaniyaning «Saragosa» va Fransiyaning «Strasbur» jamoalaridagi faoliyati bilan tanilgan. Faoliyatining katta qismini esa Argentina chempionatida o‘tkazgan.