Uzbekistan Airways barcha mahalliy aviaqatnovlarga chegirmalar joriy etdi. Bu haqda aviakompaniya matbuot xizmati xabar bermoqda.
Qayd etilishicha, chegirmalar respublika aholisi uchun 2021 yil 1 yanvardan 3 yanvargacha bo‘lgan yangi yil bayramini nishonlash davrida amal qiladi.
Chegirma quyidagi fuqarolarga amal qiladi:
- individual yo‘lovchilar uchun — 30 foiz;
- turistik guruhlar (5 va undan ortiq kishi), maktab o‘quvchilari, kollej o‘quvchilari, litseylar, oliy o‘quv yurtlari, IIV, MV, DXX, DSQ, DBQ va boshqa idoralarning maxsus o‘quv yurtlari talabalari va tinglovchilari uchun — 40 foiz;
- oila (2 va undan ortiq kishi, ya'ni: er-xotin, er-xotin va ularning 18 yoshgacha bo‘lgan bolalari, 18 yoshgacha bolasi bo‘lgan ota yoki 18 yoshgacha bolasi bo‘lgan onalar) uchun — 50 foiz;
- pensionerlar uchun — 50 foiz;
- nogironlar uchun — 50 foiz;
- 1941-1945 yillardagi urush qatnashchilari va ularga tenglashtirilgan shaxslar uchun — 50 foiz;
- 1941-1945 yillardagi urush paytida front ortida fidokorona mehnati va benuqson harbiy xizmati uchun orden va medallar bilan taqdirlangan shaxslar uchun — 50 foiz;
- Chernobil AESdagi falokat oqibatlarini bartaraf etishda ishtirok etganlar uchun — 50 foiz.
Bundan oldin, talaba va o‘quvchilarga poyezd chiptalari uchun 50 foiz chegirma berilishi xabar qilingandi.