19:28 / 07.01.2021
4323
Ўзбекистонда амалдорлар содир этаётган жиноятлар сезиларли камаяётгани айтилди

Мамлакатда 2017–2019 йилларда порахўрлик жиноятлари 53 фоизга камайган, деб маълум қилди Аксилкоррупция агентлиги.

Ўзбекистонда 2019 йилда порахўрлик жиноятлари 2017 йилга нисбатан 53 фоизга, мансабдорлик билан боғлиқ жиноятлар эса 60 фоизга камайган, дея маълум қилди Коррупцияга қарши курашиш агентлиги директори ўринбосари Умида Тўхташева.

Унинг сўзларига кўра, мансабдорлар содир этган жиноятлар оқибатида 2019 йилда давлатга 1 триллион сўмдан ортиқ, 2020 йилнинг 9 ойида 346 миллиард сўм зарар етган.

Таъкидланишича, коррупцияга қарши курашда фуқаролар фаоллигини ошириш учун уларни моддий рағбатлантириш керак.

«Вазирлар Маҳкамасининг 2017 йилдаги қарорига асосан, ҳуқуқбузарликлар профилактикаси ва жиноятчиликка қарши курашишда 326 нафар фуқародан 100 нафари жами 78 миллион сўмдан ортиқ пул мукофоти билан рағбатлантирилган.

Аммо мазкур қарор асосида коррупцияга оид ҳуқуқбузарлик ҳақида хабар берган шахслар рағбатлантирилмаган, шунингдек, давлат хизматчиларини рағбатлантириш назарда тутилмаган», – деди Тўхташева 7 январь кунги матбуот анжуманида.

Эслатиб ўтамиз, 2020 йилнинг 31 декабрида коррупцияга оид ҳуқуқбузарлик ҳақида хабар берган шахсларни рағбатлантириш тартиби тасдиқланди.

Top