08:41 / 13.01.2021
14302
Трамп импичмент қилиниши мумкинлигига изоҳ берди

АҚШ президенти Доналд Трамп демократларнинг унга импичмент эълон қилиш режасига изоҳ бериб, буни “алвастиларга катта ов” деб атади.

Фото: Reuters

“Биз зўравонликни хоҳламаймиз. Импичментга келсак, у сиёсий тарихдаги алвастиларга энг катта овнинг давомидир. Бу мутлақ бемаънилик. Ўйлашимча, импичмент ақл бовар қилмас даражада ғазаб уйғотади”, деб айтган Трамп. 

У, шунингдек, ижтимоий тармоқларда ўзига қарши қаратилган ҳаракатларга ҳам муносабат билдирган. Унинг айтишича, ижтимоий тармоқ одамларни ажратади ва улар ўртасига “нифоқ солади”.

“Мен IT-компаниялар томонидан ҳозирдагидек салбий муносабатни ҳеч қачон кўрмаганман.  Катта технологиялар АҚШда расво иш қилмоқда”, деб айтган АҚШ президенти.

Трамп, шунингдек, унинг Капитолий олдида сўзлаган нутқи “мутлақ ўринли” бўлганини айтган. Ўшанда у Байденнинг ғалабасини ҳеч қачон тан олмаслигини, ўзини эса ғолиб деб ҳисоблашини айтган. 

Трампнинг ушбу нутқидан кейин Вашингтонда унинг тарафдорлари иштирокида тартибсизликлар юз берганди. 

Аввалроқ демократлар 6 январда юз берган ушбу тартибсизликлар учун Трампни лавозимидан четлатишни таклиф қилишганди. Шунингдек, ўша воқеалардан кейин Трамп исён кўтаришга чақиришда айбланиб, унинг бир қатор ижтимоий тармоқлардаги аккаунтлари тўсиб қўйилганди.  

АҚШ президенти ҳокимиятнинг сайланган президент Жо Байденга топширилишини ҳеч қачон осойишталик билан қабул қилмаслигини айтган. Унинг таъкидлашича, америкаликларнинг сўз эркинлигига ҳуқуқи ҳозирда ҳар қачонгидан кўра кўпроқ тажовузга учрамоқда.  

ОАВ маълумотларига кўра, вакиллар палатаси Трампнинг импичменти бўйича 13 январда овоз бермоқчи. Бироқ уларнинг Трампни ҳокимиятдан четлатишга ушбу иккинчи уриниши ҳам сенатда қўллаб-қувватланиши даргумон ҳисобланади, чунки у ерда кўпчиликни Трампнинг партиядошлари – республикачилар ташкил қилади.

Top