21:56 / 19.01.2021
12803
Депутатлар такси қилаётганлар ўзини ўзи банд қилган фуқаролар рўйхатига киритилиши кераклигини айтди

19 январь куни Олий Мажлис Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси томонидан «Лицензиялаш, рухсат бериш ва хабардор этиш тартиб-таомиллари тўғрисида»ги қонун лойиҳасини иккинчи ўқишга тайёрлашга бағишланган фракциялараро мунозара ўтказилди.

Парламент матбуот хизматининг маълум қилишича, тадбирда шахсий автотранспортидан фойдаланган ҳолда йўловчи ташиш хизматини кўрсатиш орқали фаолият юритаётганлар масаласига ҳам эътибор қаратилган.

«Шахсий автотранспортидан фойдаланган ҳолда йўловчи ташиш хизматини кўрсатиш фаолиятини лойиҳада белгиланган «Амалга оширилиши учун лицензия талаб қилинадиган» фаолият туридан чиқариб, «Ваколатли органларни хабардор қилиш тартибида амалга ошириладиган» фаолият турлари рўйхатига киритишни, яъни такси хизматини кўрсатаётган тадбиркорларимизга ўз фаолиятларини қонуний амалга оширишларида енгиллик яратишни илгари сурди.

Ушбу фаолият турини бир рўйхатдан иккинчи рўйхатга олиниши ҳайдовчиларга йўловчиларни шаҳар, шаҳар атрофида ва шаҳарлараро енгил автомобилларда ташиш учун рухсатнома олиш жараёнини енгиллаштиради ва тўлов суммасини адолатли белгиланишига олиб келади», дейилади хабарда.

Шунингдек, лицензиялаш, рухсат бериш ва хабардор этиш тартиб-таомиллари рўйхатига нотариал идоралар ва уй боғчалари киритилмагани ҳам депутатларнинг норозилигига сабаб бўлган.

«Уй боғчалари билан шуғулланиш қайсидир маънода ёш болалар учун жавобгарлик масъулиятини олиши лозим. Шундай таклифлардан яна бири бу лицензияни алоҳида филиалларга қўлланмаслигидир. Бу турдаги енгиллик айрим «ишбилармонлар» учун қонунни айланиб ўтишларига имкон бериши мумкин. Яъни, лицензия олмай туриб бирор бир катта юридик шахс билан ўзаро тил бириктириб, ўзини катта юридик шахснинг бир филиали сифатида кўрсатиши мумкин», деган ЎзХДП фракцияси аъзоси Шоҳиста Турғунова.

Маълум қилинишича, ушбу тадбирда билдирилган таклиф ва фикр-мулоҳазалар қонун лойиҳасини такомиллаштириш жараёнида кўриб чиқилади.

2020 йилнинг 19 майдаги президент селекторида таксичилар даромад солиғини тўлашдан озод этилиши маълум қилинган, аммо 9 июнда эълон қилинган тегишли қарорда таксичилар кўзда тутилмаган эди.

Шундан сўнг кенг жамоатчилик 2021 йил 1 январдан жисмоний шахсларга ўзини ўзи банд қилган шахслар сифатида 5 кишидан кўп бўлмаган ўриндиқли (ҳайдовчини ҳисобга олган ҳолда) енгил автомобиль транспортида ташиш фаолиятини амалга оширишга рухсат берилишини кутаётганди. Лекин, президент Шавкат Мирзиёевнинг «Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида»ги фармонида ҳам ушбу банд тушириб қолдирилди.

Сентябр ойи бошида эса молия вазири ўринбосари Дилшод Султонов таксичиларни ҳам ўзини-ўзи банд қилганлар рўйхатига қўшиш бўйича ишланаётгани ва бу бўйича 1-2 ойда Вазирлар Маҳкамасига таклиф киритилишини маълум қилди.

2020 йилнинг декабр ойида бўлиб ўтган матбуот анжуманида Давлат солиқ қўмитаси раиси ўринбосари Фазлиддин Умаров киракашлик билан шуғулланаётганлар ўзини ўзи банд қилувчи сифатида рўйхатдан ўтса, аҳолининг хавфсизлигини таъминлаш билан боғлиқ масала юзага келишини айтган эди. Шунингдек, у бу масала бўйича махсус ишчи гуруҳи тузилгани ҳамда мақбул ечим изланаётганини айтган.

Top