22:55 / 22.01.2021
8929
Исёнчилар Марказий Африка Республикаси пойтахтини қуршаб олишди

Мамлакат ҳудудининг учдан икки қисмини назорат қилаётган исёнчилар пойтахтни қуршаб олишган. Армия ва БМТ тинчликпарвар кучлари ушбу ҳужумни тўхтатишга уринмоқда.

Фото: Reuters

Марказий Африка Республикасида (МАР) исёнчи гуруҳларнинг пойтахт Банги шаҳрига ҳужум қилиши сабабли фавқулодда вазият режими эълон қилинди, деб хабар бермоқда BBC News.

Ҳукумат вакилининг сўзларига кўра, режим 15 кун амал қилади ва ҳарбийлар суд санкцияларисиз ҳибсга олишларни амалга оширишларига имкон беради.

Мамлакат ҳудудининг учдан икки қисмини назорат қилаётган исёнчилар пойтахтни қуршаб олишган. Армия ва БМТ тинчликпарвар кучлари ушбу ҳужумни тўхтатишга уринмоқда. БМТ бош котибининг махсус вакили ва МАРдаги вазиятни барқарорлаштириш бўйича миссия раҳбари Манкер Ндиайе мамлакатдаги хавфсизлик борасидаги вазият мураккаб эканлигини айтди.

Исёнчи гуруҳлар президент Фостен Арканж Туадеранинг қайта сайланиши қонунийлигига қўшилмаяпти. МАР ҳукумати эса ўз навбатида собиқ давлат раҳбари Франсуа Бозизени мамлакатда беқарорлик келтириб чиқаришда айбламоқда.

 27 декабрда МАРда президент сайлови бўлиб ўтди. Бозизега сайловда қатнашишга рухсат берилмади. БМТ ҳарбийлашган гуруҳларни қўллаб-қувватлашда айблаб, унга қарши санкциялар жорий этган. Туадера давлат раҳбари этиб қайта сайланди..

Top