Vazir: «Nodavlat umumta'lim muassasalarida o‘quvchilar soni ortishi davlat budjetiga tushadigan yukni kamaytiradi»

Unda Xalq ta'limi vaziri Sherzod Shermatov nodavlat umumta'lim muassasalari tashkil etish bo‘yicha Senatga taklif bilan chiqdi, deya xabar bermoqda Kun.uz muxbiri.

«O‘zbekistonning aholi zich joylashgan hududlarida umumta'lim maktablarining yuklanganlik koeffitsiyenti 2 va undan ortiq bo‘lgan qo‘shimcha umumta'lim maktablarini tashkil etishga ehtiyoj mavjud.

Ushbu hududlarning shahar va tuman markazlarida joylashgan foydalanilmasdan bo‘sh turgan yer uchastkalarini xususiy tadbirkorlarga nodavlat umumta'lim muassasalarini tashkil etish uchun ajratish kerak», – dedi vazir.

Sherzod Shermatovning ta'kidlashicha, prezident farmoni bilan nodavlat umumta'lim muassasalariga berish uchun bo‘sh yer uchastkalari (har bir hududda yiliga 50 lotdan kam bo‘lmagan) ro‘yxatini tasdiqlash va ulardan foydalanish huquqini «E-IJRO AUKSION» yagona elektron savdo maydonchasida realizatsiya qilish belgilangan.

Ammo bugungi kunga qadar shu farmon ijrosi bo‘yicha mahalliy hokimliklar tomonidan birorta ham yer uchastkalari xususiy tadbirkorlarga ajratilmagan.

«Xususiy tadbirkorlarga bo‘sh yer uchastkalarini nodavlat umumta'lim muassasasi tashkil etish maqsadida ajratish orqali, hududlardagi to‘lov qobiliyati yuqori bo‘lgan aholi qatlamiga o‘z farzandlarini nodavlat umumta'lim muassasalariga berish imkoniyati yaratiladi va umumta'lim maktablarining yuklanganlik koeffitsiyentini pasaytirishga erishiladi.

Natijada, nodavlat umumta'lim muassasalariga qamrab olingan o‘quvchilar sonining ortishi, kelgusida Davlat budjetiga tushadigan yukning kamayishiga olib keladi», – dedi Xalq ta'limi vaziri.