Мьянмалик ҳарбийлар 1 февралдаги воқеалар вақтида бир неча юз кишини, жумладан ҳукмрон “Демократия учун миллий лига” партиясининг раҳбарияти ва фаолларини ҳамда партия етакчиси, ташқи ишлар вазири Аун Сан Су Чжини ҳибсга олишган.
Шунингдек, мамлакат пойтахти Нейпьидода партиянинг парламентдаги барча аъзолари, партия раҳбарияти оилалари аъзолари ҳам ҳибсга олинган. Бу ҳақда Япониянинг Kyodo ахборот агентлиги хабар берди.
Kyodo’да таъкидланишича, парламентнинг миллий озчиликни билдирувчи партиялардан депутатлари, ҳарбийларни танқид қилган баъзи жамоат арбоблари ҳам ҳибсга олинган.
Аун Сан Су Чжи уй ҳибсига олинган. Унга вақти-вақти билан қароргоҳи ҳудуди бўйлаб сайр қилиб туришга рухсат берилган.
1 февралда мьянмалик ҳарбийлар мамлакат раҳбариятини ҳокимиятдан четлатиб, мамлакатда бир йиллик муддатга фавқулодда вазият киритилишини эълон қилишди. Улар бу ҳаракатларини 2020 йил ноябрда ўтган парламент сайловларида йўл қўйилган сохталаштиришларга жавоблари билан тушунтиришган. Сайловларда “Демократия учун миллий лига” партияси катта устунлик билан ғалаба қозониб, 1 февралда ҳукуматнинг янги таркибини шакллантиришни бошлаши керак эди.
