22:10 / 04.02.2021
9991
Қишнинг энг асосий трансферлари

Одатда камтарроқ ўтадиган қишки трансферлар ойи бу сафар янада зерикарлироқ кечди. Пандемия туфайли юзага келган инқироз бой клубларга ҳам жиддий зарба берди. Бу сафар қишки трансферларда сарфланган маблағлар икки баробар камроқни ташкил этди, қишнинг энг қиммат трансфери эса 23 миллион евролик бўлди - «Вест Ҳэм» ёзда «Брентфорд»дан ижарага олинган Саид Бенраҳманинг трансфер ҳуқуқини сотиб олди. Қуйида қишнинг энг асосий 15 трансфери ҳақида келтирилади.

15. Ислам Слимани – «Лестер»дан «Лион»га (эркин агент)

Слимани «тулкилар» учун муваффақиятсиз харид бўлиб чиқди. Уни чемпионликдан кейинги ёзда харид қилишган, ўшанда бирданига топ-клублар қаторига қўшилиб қолган «Лестер» захира ҳужумчиси учун 27,9 млн фунт сарфлашганди. Ислам биринчи мавсумида деярли ҳар ўйинда иштирок этди, аммо ўша мавсумда «Лестер» лигани тарк этишдан базўр қутулиб қолди – кейинги йилларда эса у клуб учун «очилмайдиган чамадон»га айланди - сўнгги мавсумлар «Ньюкасл», «Фенербаҳче» ва «Монако» клубларида ижарада ўтди.

Варди борлигида бошқа ҳужумчилар учун «Кинг Пауэр»да ўзини кўрсатиш учун деярли ҳеч қандай имкон бўлмайди. Аммо ҳозирда Айосе Перес иккинчи скрипка ролини бажаришни уддаламоқда (Варди билан жуфтликда, асосий ҳужумчи ортидан ёки қанотларда). Слимани эса бундай қила олмаганди, шу туфайли Перес эмас, айнан у «Лестер»да ўринбосарлар жамоасида ўйнади. Энди у ҳужумкор «Лион»да имкониятини синаб кўради.

14. Демарай Грей  «Лестер»дан «Байер»га (1,8 млн фунт)

Ўтган ўн йилликларда англиялик футболчилар Европанинг бошқа қисмларига боришмасди. Энди эса ўртамиёна, миллий жамоа сафида ўйнамаган ва ҳатто сўнгги ярим йилни ўйин амалиётисиз ўтказган футболчи ҳам ЕЧЛ йўлланмаси учун кураш олиб бораётган немис клуби учун керак бўлиб қолди.

Аслида, Грей ноунейм эмас. У Англиянинг ўсмирлар ва ёшлар жамоаларидаги асосий етакчи футболчи бўлган, беш йил муқаддам «Лестер»га чемпионлик мавсуми арафасида қўшилганди. Роджерс даврида эса Демарай асосий таркибдан четда қолди, айни вақтда ҳужум чизиғида рақобат кучли. Грей учун чап қанот ҳужумида ўйнаш қулай, немис клуби бош мураббийи Петер Бош сўнгги ўйинларда бу позицияга бегона бўлган Вирц ва Бэйлини ўйнатишга мажбур бўлмоқда, у ушбу трансфер орқали жамоа ҳужум чизиғида январ ойида кузатилган муаммоларни ҳал қилишни кўзлаган.

13. Ўзан Қобоқ – «Шальке»дан «Ливерпуль»га (ярим йиллик ижара учун 1 млн фунт)

Сўнгги йилларда «қизиллар»нинг трансфер сиёсати кўп мақтов олмоқда. Албатта, клуб Клопп мураббийлиги даврида янги харидларни амалга оширишда кам хато қилди, аммо бу сафар марказий ҳимоячи танлашда жуда кўп вақт сарфланди ва бу кўплаб очколар йўқотилишига олиб келди. Клуб Ўзанни ўрганишни ярим йил аввал бошлаганди, аммо у бўйича шартнома қишки трансферлар даричаси ёпилиши арафасида имзоланди – бунда Матип мавсум якунига қадар сафдан чиққани ҳам рол ўйнади. Лекин ушбу йўқотишсиз ҳам клубга центрбек жуда зарур эди? Агар Кабак 1 февралдамас, 1 январда келганида қанча очко ёнга қолган бўларди?

Ўзан ёш, аммо 20 ёшгача у профессионал футболда қарийб юз ўйинда майдонга тушган, шу жумладан халқаро ўйинларда ҳам: терма жамоа ўйинларида ҳам, еврокубокларда ҳам. Шу томони билан у Филлипс ва Уильямсдан яққол устун, биринчиси шу мавсумга қадар юқори лига ўйинларида иштирок этмаганди, иккинчиси – умуман профессионал футболда майдонга тушмаганди.

Шу билан бирга – бу мавсумда Бундеслиганинг 19 ўйинида 49 гол ўтказиб юборган жамоа ҳимоячисини мақташ мушкул. Европанинг энг ёмон ўйин кўрсатаётган жамоаларидан бири сафидан қитъанинг энг яхши жамоаларидан бири сафига келиб қўшилгач, юзага келадиган босимни у қандай енгиб ўтади, кузатамиз.

12. Себастьен Аллер – «Вест Ҳэм»дан «Аякс»га (22,5 млн евро)

2018/2019 йилги мавсумда Франкфуртнинг «Айнтрахт» жамоаси Европадаги энг кучли ҳужум учликларидан бири эди. Ребич — Аллер — Йович триоси Германиядаги клубларнинг ҳимоячиларини бирин-кетин доғда қолдириб, сал қоса ўртамиёна жамоани Европа Лигаси ғолибига айлантириши мумкин эди. Лекин ёзга бориб бу учлик тарқалиб кетди: Ребич «Милан»га, Йович – «Реал»га, Аллер эса 50 млн евро эвазига кутилмаганда «Вест Ҳэм»га йўл олди.

Аммо ушбу трансферларнинг ҳеч бири кутилганидек бўлмади: фақат Ребичда фаолиятини давом эттириш имконияти сақланиб қолди, аммо у ҳам дастлаб ёрқин ўйнаб кетолмаганди – Йович ва Аллер эса пойтахт клубларида кўп қолишмади. Аллер Лондон клубида Майкл Антониога рақобат қила олмади. У ўтган мавсумда 7 гол урганди, жорий мавсумнинг биринчи даврасида эса 3 гол билан кифояланди. Қишки трансферлар аввалида унга «Аякс» харидор бўлди ва «Вест Ҳэм» ўйланмасдан уни сотиб олинган нархидан икки баробардан ҳам арзонроққа сотиб юборди. Француз ҳужумчиси Амстердамда яна аввалгидек ўйнай бошлади - дастлабки беш ўйинида 2 гол ва 3 голли узатма.

11. Виллиан Жозе – «Сосьедад»дан «Вулверҳэмптон»га (ижара)

Хименес жиддий жароҳат олганидан кейин «Вулверҳэмптон»га тажрибали форвард керак бўлиб қолди: Фабиу Силва ҳали ёш. Январда клуб Патрик Кутронни «Фиорентина»дан қайтарди, аммо кейин уни таркибда олиб қолмасликка қарор қилишди: италиялик ҳужумчи «Валенсия»га ижарага берилди. Диего Костага қизиқиш билдирилаётгани ҳақида хабарлар тарқалганди, аммо якунда «Сосьедад»дан Виллиан Жозе ижарага олинди.

Бу мавсумни Испанияда бразилиялик футболчи аввалгиларидек ўтказмаётганди (13 ўйинда 3 гол), лекин унга қадар тўрт мавсум давомида камида 10тадан гол урган. У Англияда ҳам жамоасига фойда келтиришни бошлаб юборди, «Арсенал»га қарши ўйиннинг биринчи бўлимида пенальти ишлаб, рақиб бир киши кам бўлиб қолишига ва якунда ғалаба қозонилишига ҳисса қўшди.

10. Амад Диалло – «Аталанта»дан «МЮ»га (21 млн евро)

«Манчестер Юнайтед» ҳужум қанотини қандай кучайтириш ҳақида кўп ўйлади. Усмон Дембеледан тортиб Жейдон Санчогача бўлган номлар айланди. Аммо ушбу футболчилар билан келишишнинг имкони бўлмади ва «МЮ» «Аталанта»нинг ёш вингери Амад Диаллога ишонч билдирди.

Ушбу трансфер масаласи ўтган йилнинг октябридаёқ ҳал бўлганди, аммо «МЮ» расмиятчилик ишларини январга қолдирди. Натижада Диалло Чемпионлар лигасида дебют қилишга улгурди (А Серияда у ўтган мавсумдаёқ илк ўйинини ўтказганди) – бу АПЛда ишлаш учун рухсат берувчи балларни келтирди.

«Аталанта» вингерни мавсум якунига қадар ижарага қолдиришни сўраганди, аммо Сульшер бошқача фикрда эди: бош мураббий Англия футболига кўниккунига қадар Амадни «МЮ» ўринбосарлари жамоасига юборди. Яқинда у «Ливерпул»даги тенгдошларига қарши ўйинда дублни расмийлаштирди.

Трансфер қиймати юқори — катталар футболида атиги беш ўйин ўтказган 18 ёшли ивуарлик учун «қизил иблислар» 21 млн евро сарфлашди. Бонуслар ҳисобига бу рақам 40 млн еврогача етиши мумкин. 

9. Александр Кокорин – «Спартак»дан «Фиорентина»га (4,5 млн евро)

Европадаги россиялик футболчилар сони яна биттага кўпайди. Кокорин 30 ёшида «Фиорентина» аъзосига айланди. У ўз фаолиятида нооддий йўлни босиб ўтди: Россия футболининг умидларидан бири бўлишдан футболчилар рўйхатидан чиқишгача. У сўнгги икки йил ичида жами 20 ўйинда майдонга тушган ва бирданига топ-лигада пайдо бўлмоқда. Энди у Френк Рибери билан бирга тўп суради.

8. Жесси Лингард – «МЮ»дан «Вест Ҳэм»га (ижара)

Лингард бу мавсумда фақат Кубок ўйинларида жами 179 дақиқа майдонда ҳаракат қилди, уч ойни жароҳат туфайли ўтказиб юборди: сентябрда Лига кубоги ўйинида майдонга тушди, кейин даволанди (Сульшернинг сўзларига кўра), январ ойи бошида Англия Кубоги доирасида «Уотфорд»га қарши ўйинда иштирок этди. Энди эса барчасини қайта бошлаши учун ижарага бериб юборилди.

Смоллинг билан бўлганидек, баъзида Манчестердан кетиш ҳам фойдали бўлади. У «Вест Ҳэм» сафидаги дебютида дублни нишонлади.

Сульшернинг айтишича, у Жессини қўйиб юбормоқчи бўлмаган: мавсум узун, тақвим тиғиз ва у албатта мураббийга керак бўларди. Аммо Жессининг ўзи кўпроқ ўйин амалиётига эга бўлишни истаган.

7. Мусса Дембеле – «Лион»дан «Атлетико» (мавсум якунигача ижара)

Испания чемпионати етакчиси — Мадриднинг «Атлетико» клубида — ҳужумчига эҳтиёж сезилди. Диего Коста билан шартнома бекор қилингач, биргина Суарес билан узоққа бориб бўлмасди, 34 ёшли футболчи мавсум давомида бир хилда ўйин кўрсатишини кутиш қийин. Уругвайлик футболчига «Лион»дан ижарага олинган Мусса Дембеле ёрдам беради.

Ўтган мавсумда жуда яхши ўйин намойиш этган 24 ёшли французнинг натижалари (чемпионат ўйинларида 16 гол) бу мавсумда пасая бошлади: у «Лион» сафидаги 16 ўйинда атиги бир гол урган. Дембеленинг ўйинидаги пасайишга «Лион» афсонаси, ҳозирда клуб спорт директори бўлган Жуниньо Пернамбукано изоҳ берди. «Мусса олдимга келди ва иштиёқини йўқотгани туфайли клубни алмаштириши кераклигини айтди», — дея Жуниньонинг сўзларини келтиради Telefoot.

Ижара барча учун идеал вариант ҳисобланарди: «Атлетико» ярим мавсум учун 1,5 млн евро эвазига юқори савияли форвардга эга бўлди, «Лион» вақтинча бош оғриқдан қутулди, Дембеле эса ўзи учун янги шароитларда «қайта тикланиш» имкониятига эга бўлди. Бундан ташқари, «матрасчилар» мавсум якунида Дембеленинг трансфер ҳуқуқини 33,5 млн евро эвазига сотиб олиши мумкин. «Лион» Слиманини эркин агент сифатида текинга қўлга киритиб, унинг ўрнини тўлдирган.

6. Доминик Собослаи – «РБ Зальцбург»дан «РБ Лейпциг»га (20 млн евро)

Венгриялик ёш юлдуз Собослаи кучлироқ лига жамоасига бориб қўшилиши кутилганди. У аллақачон «Зальцбург» даражасидан ўсиб кетган, бошқа «Ред Булл» — бу сафар Лейпцигдагиси — унга ўзини янада тўлиқроқ намоён этиш учун имкон. «Ўйлайманки, «Лейпциг» менинг ривожланишим учун идеал даражада тўғри келади. Мен катта амбицияларга ва ёшлардан иборат жамоага ўтдим, бу ерда топ-мураббий ишлайди», — деганди Собослаи ўзининг трансфери бўйича.

Доминик ҳозиргача янги клуби сафида дебют қила олмади, у жароҳатидан даволанишда давом этмоқда. «Лейпциг»га ҳам айнан ҳозир унга эҳтиёж йўқ эди, аммо раҳбарият ўтган йилги хатони такрорламасликка қарор қилди - ўшанда Ҳоланд «Залцбург»дан «Лейпциг»га эмас, «Боруссия» Дортмунд сафига ўтганди.

5. Аркадиуш Милик – «Наполи»дан «Марсель»га (ярим йиллик ижара)

«Наполи»дагилар польшалик ҳужумчига катта умидлар боғлашганди. Милик уларнинг ишончининг бир қисминигина оқлади: энг яхши кўрсаткичи 2018/2019 йилги мавсумда қайд этилди, ўшанда у 47 ўйинда 20та гол урганди. Қолган вақтда Аркадиуш барқарор ўйин кўрсата олмади, бунга унинг кўп марта жароҳат олиши сабаб бўлди.

2020 йил ёзида у «Наполи» билан шартномани узайтиришдан бош тортиб, Сарри бошқарувидаги «Ювентус»га ўтишни кўзлаганди, аммо бу трансфер амалга ошмади. «Наполи» эса уни янги мавсумга заявка қилмади. Футболчи Европа чемпионатида иштирок этиш учун ўйин амалиётига эга бўлиш мақсадида ўзини трансферга қўйишларини сўради, неаполликлар унинг трансфери учун белгилаган 15 миллион еврога ҳеч қайси клуб рози бўлмади. Якунда уни «Марсель» кейинроқ сотиб олиш ҳуқуқи билан ижарага олди. Ёзда французлар уни 8 миллион еврога сотиб олиши мумкин (яна бонуслар кўринишида 5 миллион евро). Балки Аркадиуш Францияда фаолиятини қайтадан бошлар?

4. Лука Йович  «Реал»дан «Айнтрахт»га (мавсум якунигача ижара)

Лука Йович ҳам катта клубда ўйнаб кета олмади. У Мадридда ўтган мавсумда чемпионат ўйинларида 2 гол урди, бу мавсумда эса - 0. Зидан унга имконият берди, аммо у гол урмади, 63 миллион евро эвазига кўп нарса қилиш керак эди.

Ўйиндаги муаммолардан ташқари, сербиялик форвард бир неча марта ноқулай вазиятга тушиб қолди: ғалати ҳолатда оёғини синдириб олди, карантинни бузди ва қамоққа тушишига бир бахия қолди!

«Қироллик клуби» Йовични қайта тарбияланиш учун собиқ клуби «Айнтрахт»га юборди. Бу ерда Лука 2018/2019 йилги мавсумда ёрқин ўйинлар намойиш этгач, гранд клублар назарига тушиб, якунда «Реал»га ўтганди. Йович «Айнтрахт»да яна очилди - қайтганидан буён тўрт ўйинда уч гол урди. Бу «Реал»да бир ярим йилда урганидан кўпроқ. Эҳтимол, «Айнтрахт» туфайли Йович яна «Реал» даражасидаги клубда иккинчи имкониятга эга бўлар.

3. Алехандро «Папу» Гомес – «Аталанта»дан «Севилья»га (5,5 млн евро)

«Аталанта»нинг 7 йиллик етакчиси ва сардори жамоа бош мураббийи Жан Пьеро Гасперини билан жанжаллашиб қолгач, клубни тарк этишга мажбур бўлди. Вазият кун сайин кескинлашиб борди, «Мидтъюлланд» билан ўйиндаги жанжалдан кейин (ўшанда Гомес мураббий қарорига кўра қанотда ўйнашга рози бўлмаганди) аргентиналик футболчи Бергамо билан хайрлашгунига қадар бир ойдан ошиқ вақт ўтди.

Энди Гомес «Севилья» шарафини ҳимоя қилади. Трансфер андалусияликларга 5,5 млн еврога тушди, гарчи Transfermarkt Алехандрони кўпроққа баҳолаган (15 млн евро). Гомес «Интер» ёки «Ювентус»га ўтиши ҳам мумкин эди, аммо «Аталанта»нинг А Сериядаги рақиблари сафини кучайтиришни истамади. Бергамоликларнинг собиқ сардоридан чиройли қарор.

2. Мартин Эдегор – «Реал»дан «Арсенал»га (мавсум якунигача ижара)

«Арсенал» «ўнлик» позициясига футболчи топди. Мартин Эдегор ўйин амалиётига эга бўлиш учун Мадриддан Лондонга кўчиб ўтди. Қатор ижара мавсумларидан кейин «Қироллик клуби»га қайтган Мартин барибир ўзини кўрсата олмади ва яна ижарага йўл олди.

Мавсумнинг қолган қисмини Мартин «Арсенал»да ўтказади. Эдегорнинг «Реал»даги келажаги туманли бўлсада, клуб уни сотишни истамаяпти. Шу туфайли, «Арсенал» билан шартномада ҳам кейинроқ сотиб олиш ҳуқуқи киритилмаган.

1. Месут Ўзил, «Арсенал»дан «Фенербаҳче»га (эркин агент)

«Арсенал» қишки трансферлар ойнасида энг кўп ишлаган клуб бўлди. Эдегор қиёфасида кучайиш ҳам иккинчи планга тушади, ахир «канонирлар» ниҳоят бюджетга оғир юк бўлаётган балластдан қутулишди. Колашинац «Шальке»га ижарага берилди, Сократис ва Шкодран Мустафи билан шартнома бекор қилинди - грециялик футболчи «Олимпиакос»га, германиялик футболчи «Шальке»га ўтди. Месут Ўзилнинг маоши эса ҳамманикидан юқори эди: қарийб бир йил давомида футболдан ташқарида бўлган германиялик «Арсенал»дан ойига 350 минг фунт олишда давом этди. 

Лекин Ўзил охиригача кетишни истамади. У «Арсенал» билан шартномаси муддати тугагунча қолмоқчи бўлди, аммо вазиятга «Фенербаҳче» аралашди. «Мен жуда ҳаяжондаман. «Фенербаҳче» раҳбарияти ва мухлислар бу трансфердан хурсанд, улар менинг ҳам эски орзуимни рўёбга чиқаришди. Мен ҳамиша «Фенербаҳче»га мухлислик қилиб келганман. Умид қиламанки, биз биргаликда кўплаб муваффақиятларга эришамиз», деди Месут турк клуби билан шартнома имзолаш жараёнида.

Турклар клубида молиявий инқироз, аммо маҳаллий мухлислар футболчининг маошига етадиган пулни йиғиб беришди.

Top