Qishning eng ko‘p kutilayotgan transferlari: kim qayerga o‘tadi?
|21:21 / 29.12.202410 90216 min
«MYu» yulduzini haydamoqda, «Siti»ga yarimhimoyachi, «Real»ga markaziy himoyachi, «Liverpul»ga o‘ng qanot himoyachisi, «Arsenal»ga hujumchi kerak.
Yaqin vaqtlar ichida Yevropada qishki transferlar darichasi ochiladi. OAVda har kuni ehtimoliy kelishuvlar haqida xabarlar chiqib turibdi. Yanvarda kimlar klubini o‘zgartiradi? Quyidagi materialda — ehtimoli yuqori bo‘lgan transferlar haqida.
«MYu» Reshford bilan xayrlashadi
Allaqachon 27 yoshni qoralagan Markus Reshford «Manchester Yunayted»ning yangi bosh murabbiyi Ruben Amorim bilan chiqishib keta olmadi. Portugaliyalik mutaxassis vingerning futbolga jiddiy munosabatda emasligidan norozi. Shu tufayli Amorim Markusni tarkibdan chiqardi, u oxirgi o‘yinlar qaydnomasiga ham kiritilmadi, «MYu» rahbariyati ham o‘z tarbiyalanuvchisi bilan xayrlashishga tayyor. The Guardian xabariga ko‘ra, klub Reshfordni transferga qo‘ygan va yanvardayoq sotilishi mumkin — bu qarorni Amorim va klub rahbarlaridan biri Jim Retkliff kelishgan holda qabul qilgan. «MYu»dagilar ushbu futbolchining ketish vaqti keldi deb hisoblashmoqda.
Bir necha yil muqaddam Reshfordga «PSJ» jiddiy qiziqqan va vaqti-vaqti bilan boshqa ehtimoliy xaridorlar ham paydo bo‘lib turgandi. Ammo endi uning uchun navbatda turganlar ko‘p emas. The Telegraph xabariga ko‘ra, hali 27 yoshda bo‘lgan Markusga Saudiya Arabistoni klublaridan qiziqish mavjud. «Al-Ittihod», «Al-Hilol», «An-Nasr», «Al-Ahli» va «Al-Qodisiya» kabi klublar uni tarkibida ko‘rishga qarshi bo‘lmaydi. Futbolchining o‘zi esa hozircha Yevropani tark etishni rejalashtirmagan. Ammo u shu qishda ketmasa, bir yarim yilini va sport formasining qolganini ham yo‘qotadi.
Viktor Dyokeresh qayerga o‘tadi?
Shvetsiyalik 26 yoshli hujumchi 2024 yilning eng yaxshi to‘purari bo‘ladi. Hozirda «Sporting» forvardi yil boshidan buyon barcha turnirlar dorasida urgan gollar soni (milliy jamoadagi natijalar ham qo‘shib hisoblanganda) 61 taga yetgan, yil oxirigacha esa Portugaliya chempionatida «Benfika»ga qarshi kechadigan yana bitta o‘yin bor. So‘nggi o‘n yillikda faqat Robert Levandovski bir kalendar yilida bundan ko‘proq gol urgandi — 2021 yilda 69 ta.
Dyokereshning natijalari Ruben Amorim ketganidan keyin pasaydi, ammo bozorda unga talab pasayishi dargumon. Viktor Lissabonda juda yorqin o‘ynamoqda. Transfermarkt uning transfer bahosini 75 million yevro qilib belgilagan, bu narx hozirda markaziy hujumchiga ehtiyoj sezayotgan «Arsenal», «PSJ», «Real» va boshqa katta klublarga qimmatlik qilmaydi.
Mavzuga oid
Ushbu skandinavning nomi birinchi navbatda uni jahonga tanitgan murabbiyining yangi jamoasi «MYu» bilan bog‘lashmoqda. Ruben Amorim qishda «Sporting»dan hech kimni olib kelmoqchi emasligini aytgandi, ammo qatorasiga uch mag‘lubiyatdan keyin fikrini o‘zgartirishi mumkin. Lekin jamoada bu pozitsiyada Hoylund ham bor. Nima bo‘lganda ham Dyokeresh shu qishda Yevropadagi asosiy lotlardan biri maqomida bo‘ladi. U baribir qayergadir o‘tadi. Hozir bo‘lmasa, yozda aniq.
Pepga yordam boradimi?
ESPN xabariga ko‘ra, yanvar oyida «Manchester Siti» yarimhimoyachi olishi aniq. Xosep Gvardiola jarohat tufayli mavsum oxiriga qadar Rodrining xizmatlaridan foydalana olmaydi. Murabbiy yangi futbolchiga muhtoj. «Manchester Siti» uchun ikkita asosiy variant — Martin Subimendi («Real Sosiyedad») va Bruno Gimarayns («Nyukasl»).
Transfermarkt uning transfer bahosini 60 million yevro qilib belgilagan. U yozda «Liverpul»ga o‘tish taklifini rad etgandi, ammo mersisaydliklar undan hali umid uzishmagan. The Telegraph xabariga ko‘ra, «shaharliklar» yanvar oyida birinchi bo‘lib taklif yuboradi. Unga «Real» va «Arsenal»dan ham qiziqish mavjud. Transfer muqarrar. Faqat 25 yoshli ushbu futbolchi qachon va qayerga ketishi aniq bo‘lishi qolgan.
«Manchester Siti» markaziy himoyachi, forvard va o‘ng qanot himoyachisi sotib olish variantlarini ham ko‘rib chiqmoqda. Ammo birinchi navbatda — yarimhimoya chizig‘i uchun futbolchi kerak. Ammo top darajadagi yarimhimoyachi transferi amaldagi chempionlar uchun mavsumni qutqarib qolishga yordam beradimi?
«Liverpul» himoya qanotini mustahkamlaydimi?
Trent Aleksander-Arnold «Liverpul» bilan muddati 2025 yil yozida tugaydigan shartnomasini uzaytirmayapti. Tomonlar o‘rtasidagi muzokaralar qiyin kechmoqda, himoyachiga Madridning «Real» klubi talabgor. Katta ehtimol bilan, Trent yozda qadrdon klubini tark etadi. «Liverpul» esa allaqachon uning o‘rniga futbolchi topgan. Bild xabariga ko‘ra, mersisaydliklar «Bayyer» himoyachisi Jyeremi Frimpongning agenti bilan aloqaga chiqqan. 24 yoshli niderlandiyalik o‘ng qanot uchun yaxshi nomzod.
The Athletic qayd etishicha, «Liverpul» Alfonso Devis uchun ham kurashda. Kanadalik himoyachi hali «Bavariya» bilan shartnomani uzaytirish yoki yozda erkin agent sifatida jamoasini almashtirish tanlovlari bo‘yicha bir qarorga kelmagan. U — «Liverpul» uchun chap qanot pozitsiyasiga ideal variant.
Ingliz top-klubi radaridagi yana bir futbolchi — Rayan Sherki. Insayder Fabritsio Romanoga ko‘ra, «Liverpul» skautlari «Lion»ning bir necha o‘yiniga tashrif buyurib, 21 yoshli fransuzni kuzatishgan.
Arteta nihoyat top-forvard oladimi?
«Arsenal»da ayniqsa bu mavsumda top «to‘qqizlik» yo‘qligi pand bermoqda. Kay Havers — yuqori saviyadagi futbolchi, ammo u klassik markaziy forvard emas. «Arsenal» xo‘jayinlari ushbu pozitsiya uchun futbolchi olish haqida o‘ylashmoqda. TEAMtalk xabariga ko‘ra, londonliklar 24 yoshli Dushan Vlahovichni 2025 yil yanvaridayoq sotib olmoqchi. 24 yoshli serb esa — arzon lot emas. Transfermarkt bo‘yicha uning transfer bahosi — 60 mln yevro. London klubi «Nyukasl»da yorqin mavsum o‘tkazayotgan shvetsiyalik 25 yoshli Aleksander Isakka ham jiddiy qiziqmoqda, ammo klubi uni osonlikcha qo‘yib yuborishga rozi emas va uni shu qishda qo‘lga kiritish uchun «to‘pchilar» rad etib bo‘lmaydigan taklif berishiga to‘g‘ri keladi.
Shuningek, «Arsenal» chap qanot himoyachisi bilan ham xayrlashadi. The Athletic Kiran Tirni klubni tark etishi haqida xabar bergan. U erkin agent sifatida «Seltik»ka qaytishi mumkin. «Arsenal» u bilan shartnomani uzaytirish bo‘yicha bandni faollashtirmagan, klubda bu pozitsiyada yetarlicha futbolchi bor (Kalafiori, Lyuis Skelli, Zinchenko, Tomiyasu).
Frenki de Yong arosatda
Niderlandiyalik yarimhimoyachi Kataloniyada o‘ynab ketolmadi. De Yongning saviyasiga shubha yo‘q, ammo doimo nimadir xalal beradi. Masalan, jarohatlar. 2023 yil boshidan buyon Frenki 296 kunni jarohatlar tufayli o‘tkazib yuborgan.
Flik esa uni asosiy tarkibda ko‘rmayapti — 27 yoshli futbolchi bu mavsumda atigi ikki bor boshlang‘ich tarkibda tushdi, germaniyalik mutaxassis nisbatan yoshroq bo‘lgan Pedri va Kasadoga ishonch bildirmoqda. Uzoq muddatlik davolanishdan qaytgan Gavi ham undan ko‘proq o‘ynamoqda. Bu bilan futbolchining yirik miqdordagi maoshi esa o‘zgarmaydi — yiliga 19 million yevro. Niderlandiyalik futbolchining «Barselona»dan ketishi barcha uchun foydali bo‘ladi.
Lekin aynan maoshi va transfer qiymati muammo bo‘lishi mumkin. Besh yarim yil muqaddam kataloniyaliklar De Yongni 86 million yevroga sotib olishgandi. O‘tgan muddat ichida unga katta maosh to‘lab kelishdi. Ehtimol shuning uchun ham Frenki uchun xaridor chiqmayapti. Ammo, bu vaqt masalasi, «Barsa» esa qiyin vaziyatda yon bershiga tayyor bo‘ladi.
«Real»ga markaziy himoyachi kerak
«Real» markaziy himoyasi qiyin ahvolda. Militao ikkinchi bor xochsimon paylari uzilgani tufayli uzoq muddatga safdan chiqqan, Alaba esa faoliyatini yakunlashga qarab ketmoqda. Faqat Ryudiger hamisha o‘ynashga tayyor — Antonio so‘nggi sakkiz yil ichida o‘ynalgan daqiqalar bo‘yicha top-15 futbolchi ro‘yxatidan o‘rin olgan.
2024 yilning ikkinchi yarmida nemis himoyachiga gohida Tchuameni, gohida yosh Asensio sherik bo‘lib tushmoqda va bu u qadar ishonchli ko‘rinmayapti. Endi jamoa rahbariyati transferlar bozoriga chiqishi va Chempionlar ligasida muvaffaqiyatli ishtirok etish hamda ichki chempionatda «Barsa» va «Atletiko» bilan raqobatlashishga xalal berayotgan muammolardan birini hal qilishi kerak bo‘ladi.
Eng ko‘p muhokama qilinayotgan nomzod — Emerik Lyaport. «An-Nasr» tomonidan qo‘yilgan qator to‘siqlar mavjud. Birinchidan, klub Yevropa chempioni bo‘lgan futbolchisini qo‘yib yuborishni istamaydi. Ikkinchidan, bunga faqat katta pul evaziga rozi bo‘lishi mmkin. Peres tarkibni mustahkamlash uchun Yevropada o‘ynamayotgan futbolchiga keragidan ko‘proq pul to‘lashga tayyormi?
Pogba o‘ziga klub topadimi?
Pol Pogba «Yuventus»ni tark etgan. 2023 yil oktyabridan buyon rasmiy o‘yinlardan maydonga tushmagan ushbu fransuz diskvalifikatsiya muddati tugashi munosabati bilan 2025 yil martida maydonga qaytishi mumkin bo‘ladi. Yanvardan esa mashg‘ulotlarni boshlash mumkin. Bunday darajadagi tekin yarimhimoyachi kimgadir kerak bo‘lishi tayin. Braziliyadagi Bolavip nashri yozishicha, martda 32 yoshda bo‘ladigan Pogba «Korintians»ga o‘tishga rozilik bergan. RMC Sport esa «Marsel»dagilar ushbu futbolchini transfer qilish haqida o‘ylayotganini xabar qilmoqda. Pogba uchun bu klubga o‘tish Fransiya milliy jamoasiga qaytish imkoniyatlarini oshirishi mumkin. Avvalroq Angliyadagi nashrlar Polni «Manchester Siti» bilan bog‘lashgandi, ammo insayder Fabritsio Romano bu ma’lumotni rad etdi.
Chiluell «Chelsi»ga kerak emas
«Chelsi»ning qishki transferlardagi asosiy vazifasi esa Chiluellni sotish. Yozda bunga erishilmagandi — «Borussiya» londonliklar so‘ragan narxga rozi bo‘lmagan, «Nyukasl»ga o‘tish esa avgustning oxirgi kunlarida barbod bo‘lgandi. Navbatdagi transferlar oynasi — navbatdagi urinish.
Jamoa sobiq sardorining qolishi uchun sabab qolmagan, buni Enso Mareskaning quyidagi iqtibosi tasdiqlaydi: «Unda pozitsiya tanlash bo‘yicha muammolar bor. Har kuni shug‘ullansang va o‘yin amaliyotiga ega bo‘lmasang, bu futbolchi uchun ham, men uchun ham yomon. Yaxshisi, o‘yin amaliyotiga ega bo‘lish uchun ketsin».
Bu safar ham ikki variant ko‘rinmoqda: «Yuventus» va «Vest Hem». Ben joriy mavsumda faqat bitta o‘yinda maydonga tushgan. Himoyachi maydonga tushish uchun maoshi sezilarli darajada kamayishiga ham rozi. U «Stemford Brij»ni tark etishi muqarrar.
«Nyukasl» ikki top futbolchini ko‘z ostiga olgan
Jurnalist Rudi Galetti «Nyukasl» Fikayo Tomoriga qiziqish bildirayotgani haqida xabar tarqatdi. «Milan» ushbu angliyalikni endi «daxlsiz» futbolchisi sifatida ko‘rmayapti. Shuning uchun italyanlar takliflar uchun ochiq. Transfermarkt bu markaziy himoyachini 22 mln yevroga baholagan.
«Nyukasl» tarkibini kuchaytirish uchun yana bir nomzod — Muhammad Quddus. Mirror Football xabariga ko‘ra, «Vest Hem» futbolchisi yanvardayoq klubini o‘zgartirishi mumkin. Ganalik 24 yoshli yarimhimoyachi uchun «Nyukasl»dan tashqari «Arsenal» va «Liverpul» ham da’vogar. Lekin futbolchi aynan «Sent-Jyeyms Park»da ko‘proq o‘yin amaliyotiga ega bo‘lishi mmkin.
«Yuventus» yoppasiga sotib olmoqchi
Mavsum«Yuventus» uchun qiyin kechmoqda. Tyago Motta jamoasi A seriyada peshqadam «Atalanta»dan o‘n ochkoga ortda qolib ketgan. Sovrin uchun kurashga qaytish uchun esa yangi futbolchilar olib kelish kerak bo‘ladi. La Gazzetta dello Sport xabariga ko‘ra, «Yuventus» Jakomo Raspadori bilan shartnoma imzolamoqchi. Turinliklar «Napoli»ning ushbu hujumchisini anchadan buyon kuzatmoqda. Motta ham futbolchiga yuqori baho beradi, Jakomoni tarkibga qo‘shib olish uchun klub kelishuvga Danilo yoki Nikolo Fajiolini qo‘shishga ham qarshi emas.
Shuningdek, «Yuve» «Nyukasl»dan Sandro Tonalini sotib olish variantini ko‘rib chiqmoqda. Inglizlar yarimhimoyachi uchun taxminan 55 mln yevro so‘raydi. Turinga ko‘chib o‘tish uchun yana bir nomzod — David Gansko. «Feyyenoord»ning slovakiyalik himoyachisi — «Yuventus» uchun yanvardagi ustuvor variantlardan biri.
Osimhen APL klubiga o‘tadimi?
Il Mattino shov-shuvli xabar tarqatdi: «Manchester Yunayted» yanvarda Viktor Osimhenni transfer qilish variantini ko‘rib chiqmoqda. Qayd etilishicha, mankunianliklar uning shartnomasidagi badal pulini to‘lashga tayyor. Nigeriyalik forvardning «Napoli» bilan shartnomasida 70 mln yevro ko‘rsatilgan. Uning «Galatasaroy» bilan ijara kelishuvida esa qaysidir klub uni sotib olish bo‘yicha bandni faollashtiradigan bo‘lsa, ijara shartnomasini ikki tomonlama rozilik asosida bekor qilish ko‘rsatilgan.
«Real» afsonasi Argentinaga bormoqda!
Argentinadagi asosiy sport nashrlaridan biri bo‘lmish TyC Spors shunday xabar berdi: «Boka Xuniors» Serxio Ramosni olmoqchi. Hozirda 38 yoshli ispaniyalik erkin agent maqomida. Shu tufayli «Boka» Ramos bilan yanvardayoq shartnoma imzolamoqchi. Jahon chempioni va Chempionlar ligasining to‘rt karra g‘olibi ekzotik ligada o‘ynab ko‘rishi mumkin. Serxio «Real»dan ketganidan keyin «PSJ»da ishlari yurishmadi va qadrdon klubi «Sevilya»ga qaytgandi. 2024 yil yozida esa ushbu klub bilan shartnomasi muddati tugaganidan buyon jamoasiz qolmoqda.
